Aqtóbede gaz quıý beketindegi órttiń sebebin arnaıy komıssııa anyqtaıdy

NUR-SULTAN. QazAqparat – Órt kezinde gaz quıý beketi aýmaǵynda 2 qyzmetker bolǵan. Sondaı-aq, kýágerlerdiń aıtýynsha, órtengen tsısterna bos bolǵan, dep habarlaıdy QazAqparat tilshisi Tótenshe jaǵdaılar mınıstrligi ónerkásiptik qaýipsizdik komıtetiniń baspasóz qyzmetine silteme jasap.

«17 shilde jergilikti ýaqytpen saǵat 19:02-de Aqtóbe oblysy Alǵa aýdanynyń tótenshe jaǵdaılar bóliminiń «101» jelisine «Lımangaz» JShS avtogaz quıý stantsııasyndaǵy órt týraly habar tústi. Órtti Aqtóbe oblysy Alǵa aýdandyq órt sóndirý qyzmeti sóndirdi», - delingen resmı aqparatta.

Habarlamada aıtylǵandaı, órt saldarynan qaza tapqandar men zardap shekkender joq.

«Aldyn ala aqparat boıynsha, gaz quıý beketi kúndizgi saǵat 12-den bastap jumys istemegen. Beket aýmaǵynda 2 qyzmetker bolǵan. Kýágerlerdiń aıtýynsha, órtengen tsısterna bos bolǵan», - deıdi vedomstvodan.

Búginde Alǵa aýdanynyń tótenshe jaǵdaılar bólimi órt sebebin anyqtaý úshin tehnıkalyq saraptama taǵaıyndady.

Sondaı-aq, ónerkásiptik qaýipsizdik komıteti bolǵan jaıttyń mán-jaıyn anyqtaýǵa qatysty komıssııa qurylatynyn jáne oqıǵa ornyna memlekettik ınspektordyń jiberilgenin habarlap otyr.

«Tolyq aqparat tergeý júrgizilip, órttiń búkil mán-jaıy anyqtalǵannan keıin usynylady», - degen túsinik berildi komıtetten.

Eske salsaq, buǵan deıin Aqtóbe oblysy Alǵa aýdanyndaǵy gaz quıý beketinde tsısterna jarylyp, kólik pen ákimshilik ǵımarattyń janyp ketkenin habarlaǵan edik.