Aqtóbede ǵasyr jasaǵan ájelerge syı-qurmet kórsetildi

«Nur Otan» partııasynyń Aqtóbe oblystyq fılıaly Halyqaralyq áıelder kúni qarsańynda ǵasyr jasaǵan ájelerdi quttyqtady. Ómiri ónegege toly, qaıratty qarııalar ózderine syı jasaǵan partııa qyzmetkerlerine alǵys bildirdi. Aqtóbe qalasynda turatyn Jaqybaı Bısenǵalıeva da úlken áýlettiń qorǵany, tiregi. Qarııa qazir 103 jasta. Ol Aqtóbe oblysy, qazirgi Hromtaý aýdany, Qyzylsý aýylyndaǵy kópbalaly otbasynda dúnıege kelgen. Oıy zerek, bilimge qushtar bolǵan Jaqybaı Bısenǵalıeva hat tanyǵanymen, aýylda molda bolmady. Sóıtip onyń talaby orta joldan kesildi. Al 30-jyldary aýylǵa orystar qonystanyp, qarapaıym turǵyndar jer jyrtyp, kókónis ege bastady. Anasy naýqas, ákesi otbasyn ózi asyraǵan kezde Jaqybaı áje de qarap qalmady. Úıdiń bar aýyrtpalyǵyn kóterip, tańnan keshke deıin eńbek etti. Baýyrlaryna qamqor bolyp, olardyń aıaqtanyp ketýine kómektesti. Sóıtip ózi kesh turmys qurdy. Otaǵasy Ǵabıt Bısenǵalıev qyzmette boldy. Jas otbasynyń bul qýanyshy uzaqqa sozylmaı, Ekinshi dúnıejúzilik soǵys bastalyp ketti.

«Soǵys bastalyp, kúıeýim Ǵabıt maǵan otbasyma qaıta oralyp, qan maıdannan kelgenshe ata-anamnyń janyna barýymdy surady. Biraq bul usynysqa kelisimimdi bermedim. Sebebi, uzatylǵan qyz aýylyna qaıta barý uıat. Sol jyldary aýylda bala-shaǵa, qarııa qaldy. Beldi bekem býyp, ózim kitaphanaǵa jumysqa turdym. Buryn árip tanyp, oqýǵa múmkindik bolmaǵan soń bárinen qol úzgen edim. Jańa jumys maǵan múmkindikter syılap, oı-tanymymdy keńeıtýge septigin tıgizdi»,- dedi Jaqybaı áje.

Kóp uzamaı aýyldyń jaǵdaıy nasharlap, bári maıdan úshin eńbek etti. Jaqybaı áje de sol kezde traktordyń róline otyrdy. Sóıtip qys aılarynda malǵa shóp tasydy. Ótken kúnderin eske alǵan qarııa qýańshylyq jyldary kezinde ózen jaǵasyndaǵy qamysty oryp, ony tuzdap, malǵa azyq etkenin aıtyp berdi.

«Men saýynshy bolyp ta eńbek ettim. Bir adam kúnine 30 sıyr saýýǵa mindetti boldy. Sol jerde 9 jyl boıy eńbek etip, zeınetke shyqtym. Bizdiń úsh balamyz boldy. Qazir bireýi janymda. Ózimdi nemerem baǵyp otyr. Men múlikke, jaqsy ómirge, baılyqqa qyzyqqan emespin. «Eńbektiń nany tátti» degen qaǵıdany ustanyp, zamannyń aǵymymen jumys isteı berdim. Biz sekildi jandardyń bir tilegi bar. Ol - eldiń amandyǵy, birligi, tynyshtyǵy»,- dedi ǵasyr jasaǵan áje.

«Nur Otan» partııasynyń oblystyq fılıaly merekede Anna Getsko, Baqyt Abıgova, Evdokııa Bondarenko, Ulmeken Kýsýpova, Aıjamal Myrzaǵalıeva, Aıbala Nazarova, Jupar Sataeva, Zıba Kelimbetova, Aıǵanym Súıinishbekova, Sapýra Abdýllınany quttyqtady.