Aqtóbede ǵasyrlyq tarıhy bar saıabaqty jóndeýge 600 mln teńge jumsalady
AQTÓBE. KAZINFORM — Saıabaq buǵan deıin jekeniń qolynda boldy. Birneshe jyl boıy sot protsesi júrip, ákimdik 2 gektar jerdi keri qaıtardy.
Aqtóbeniń eski bóliginde ornalasqan A. S. Pýshkın atyndaǵy saıabaq 35 jyl boıy jóndelmedi, jańǵyrtylmady. Sebebi jekeniń qolyna ótip, kásipker men ákimdik jyldar boıy sottasty.
— Uzaq jyl jekemenshiktiń ıeliginde bolyp, qaraýsyz azyp turdy. Ony qalanyń qoryna qaıtarý úshin birneshe jylǵa sozylǵan sot protsessteri júrdi. Qazir saıabaq sot sheshimimen jekemenshikten memleket menshigine ótti. Ony jańartý, jóndeý úshin jeke kompanııa 600 mln teńge qarajat bólýge kelisim berdi. Qazir saıabaq aýmaǵy qorshaldy. Jumysqa kirisken merdiger uıym ókilderimen qala ákimi Azamat Beket kezdesti. Ótken ǵasyrda Pýshkın saıabaǵy Aqtóbeniń mádenı ortalyǵy bolyp sanaldy. Bul park aqtóbelikter úshin ystyq, eski qalanyń júregi desek te bolady, — dep habarlady Aqtóbe qalasy ákiminiń baspasóz qyzmeti.
Saıabaqta balalardyń oıyn alańy, sýburqaq bolady. Demalysqa arnalǵan oryndyqtar qoıylyp, jan-jaǵyndaǵy qorshaý túgel alynady. Sonymen birge aǵashty saqtap, tek qýraǵan buraqty kesý, jańa aǵash túrlerin egý josparlandy.
Eske salsaq, buǵan deıin saıabaqty jańǵyrtý jobasy ázirlendi.
Saıabaq retinde bul oryn 1887-1890 jyldary qurylǵan. 1937 jyly parkke klassık aqyn, HІH ǵasyrdyń yqpaldy ádebı qaıratkeri Aleksandr Pýshkınniń aty berildi. Byltyr qysta saıabaqtaǵy attraktsıonnyń temir qańqasyn bólshektep tastady.
Aqtóbe qalasynyń ákimdigi men «A. S. Pýshkın atyndaǵy qalalyq saıabaq» JShS-i arasyndaǵy daý birneshe jylǵa sozylyp keledi. 2020 jyly saıabaq ıesi Nıkolaı Vyhodets Aqtóbe qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimin sotqa berdi.
