Aqtóbede ǵasyrdan astam tarıhy bar saıabaqtaǵy attraktsıon bólshekteldi
AQTÓBE. KAZINFORM - Aqtóbede ǵasyrdan jýyq tarıhy bar saıabaqtaǵy attraktsıonnyń temir qańqasyn bólshektep tastady. Demalys ornynyń tarıhı kelbeti saqtalyp, jańǵyrtylady.

Aqtóbeniń eski bóliginde ornalasqan saıabaq aýdany – 2 gektar. Ákimdik bıyl tozyǵy jetken saıabaq ishin jóndemek.

- Bul attraktsıondardyń bári de ótken ǵasyrdan beri turǵanyn, tozyǵy jetkenin jáne qaýipsiz emes ekenin qala turǵyndary jaqsy biledi. Jalpy, bul park eskirdi, jańǵyrtýdy qajet etedi. Tarıhı derekterge súıensek, park retinde bul oryn 1887-1890 jyldary qurylǵan. 1937 jyly parkke klassık aqyn, HІH ǵasyrdyń yqpaldy ádebı qaıratkeri Aleksandr Pýshkınniń aty berildi. Ótken ǵasyrda Pýshkın saıabaǵy Aqtóbeniń mádenı ortalyǵy bolyp sanaldy. Bul park aqtóbelikter úshin ystyq, eski qalanyń júregi desek te bolady. Sondyqtan bul orynnyń tarıhı kelbetin, atyn saqtap qalýymyz kerek. Parkti jańartyp, turǵyndar úshin demalys orny retinde jóndep beretin bolamyz. Ol úshin qazir demeýshilerdiń esebinen parktiń jobalyq-smetalyq qujattamasy jasalyp jatyr. Jańadan qosymsha jasyl jelek egiledi, sýarý júıesi tartylady, park jıhazdary, balalardyń oıyn alańy qoıylady. ıAǵnı, bolashaqta osy oryn turǵyndardyń jáne qala qonaqtarynyń mádenı demalysyna arnalǵan jaqsy saıabaqqa aınalady dep sendirgim keledi, - dedi Aqtóbe qalasynyń ákimi Azamat Beket.

Aqtóbedegi A.S.Pýshkın atyndaǵy saıabaq jekeniń qolyna ótip, uzaq jyl boıy jóndelmedi. Keıin ákimdik pen kásipker sottasty. Іs materıalyna súıensek, 1991 jyldyń 25 qańtary kúni qalalyq halyq depýtattar keńesi A.Pýshkın atyndaǵy saıabaqty ujymǵa berý sheshimin shyǵarǵan. 1992 jyldyń 29 qazanynda Aqtóbe aýmaqtyq memlekettik múlik komıteti men «A.S.Pýshkın atyndaǵy qalalyq saıabaq» ujymdyq kásiporyn arasynda satý-satyp alý kelisimsharty jasalady. Al 1995 jyldyń 21 qyrkúıegi kúni Aqtóbe qalalyq ákimshiligi aýmaǵy 23 583 sharshy metr bolatyn jer telimin ujymdyq kásiporynǵa berý týraly sheshim shyǵarady.

1996 jyldyń sáýir aıynda jerdi «A.S.Pýshkın atyndaǵy qalalyq saıabaq» JShS-ine berilgenin rastaıtyn akt alyndy. A.Pýshkın atyndaǵy saıabaq ornalasqan jer teliminiń kadastrlyq nómiri seriktestikte bolmaı shyqty. Park ornalasqan Shernııaz kóshesindegi jer telimi – Aqtóbe qalalyq TÚKSh, jolaýshylar kóligi jáne avtomobıl joldary bólimine tıesili.
Sondaı-aq, 2018 jyly qala ákiminiń qaýlysy shyqty. Onda jer telimine memlekettik mekeme jaýapty dep jazylǵan. Nıkolaı Vyhodets osy qaýlynyń kúshin joıyp, jerdiń ıesin JShS dep tanýdy suraǵanymen, sot aryzdy qanaǵattandyrmady.