Aqtóbede ǵasyrdan astam tarıhy bar saıabaq qaıta jańǵyrtylady
AQTÓBE. KAZINFORM — Ákimdik jeke kásipkerdiń qolyndaǵy saıabaqty memleket menshigine qaıtaryp, joba ázirledi. Qurylys bıyl bastalýy múmkin.
A. Pýshkın atyndaǵy saıabaq bir kezderi jekeniń qolyna ótip, ondaǵy attraktsıondar túgel tozdy. Keıin ákimdik kásipkerden jerdi memleketke qaıtarýdy talap etti. Eki aradaǵy sottyń jalǵasyp jatqanyna 5 jyldan astam ýaqyt boldy. Byltyr jergilikti ákimdik saıabaqtyń jeri memlekettik menshik ekenin habarlap, joba jasaýdy qolǵa aldy.
— Qala turǵyndary saıabaqty jańartý máselesin kóp jyldan beri kóterip keledi. Nysan uzaq ýaqyt boıy jeke menshikte bolyp, qaraýsyz qalǵan. Qazirgi ýaqytta saıabaq sot tártibimen memleket menshigine qaıtaryldy. Bul ony qaıta jańartýǵa múmkindik beredi. Demeýshi qarajat esebinen joba ázirlendi. Munda balalar alańy jáne oıyn aımaǵy, amfıteatr men sahna, sýburqaq qarastyrylǵan. Saıabaqtaǵy tarıhı eskertkishter sol kúıi qalady. Sonymen birge 66 túp aǵash otyrǵyzylady, gúlzar bezendiriledi. Shaǵyn arhıtektýralyq músin de bolady. Qurylys-montaj jumystaryn jasaýǵa qarajat endi qarastyrylady. Demeýshi metsenat tabylǵan jaǵdaıda ýaqyty josparlanady, — dep habalady Aqtóbe qalasy ákiminiń baspasóz qyzmeti.
Eske salsaq, 2020 jyly saıabaq ıesi Nıkolaı Vyhodets Aqtóbe qalalyq turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimin sotqa berdi. Búginde park ornalasqan Shernııaz kóshesindegi jer telimi — Aqtóbe qalalyq TÚKSh, jolaýshylar kóligi jáne avtomobıl joldary bólimine tıesili.
Park retinde bul oryn 1887-1890 jyldary qurylǵan. 1937 jyly parkke klassık aqyn, HІH ǵasyrdyń yqpaldy ádebı qaıratkeri Aleksandr Pýshkınniń aty berildi. Byltyr qysta saıabaqtaǵy attraktsıonnyń temir qańqasyn bólshektep tastady.