Aqtóbede garaj ishinde turǵan kólik jarylyp, bir adam aýrýhanaǵa tústi
AQTÓBE. QazAqparat – Aqtóbede kólik jarylyp, keıin janyp ketti. Qazir bir adam aýrýhanada jatyr, dep habarlaıdy QazAqparat tilshisi.
Búgin Aqtóbe qalasyndaǵy Áýe qalashyǵy aýdanynda garajda turǵan kólik jaryldy. Sol sátte garaj opyrylyp túsken.
«Habarlama túsken kezde №2 jáne 3 órt sóndirý bólimderiniń qyzmetkerleri jiberildi. Jarylystan soń kólik janǵan. Kórshi turǵan garaj da otqa oranǵan. Barlyǵy 21 adam men 5 tehnıka bardy. Arada 20 mınýt ótkende órt sóndirildi. Órt kezinde 49 jastaǵy er adamnyń kúıik shalǵany anyqtalyp, aýrýhanaǵa jetkizildi», - dep habarlady oblystyq TJD baspasóz qyzmeti.
Qazir kúıik shalǵan aqtóbelik oblystyq jedel járdem aýrýhanasynyń jansaqtaý bóliminde jatyr. Onyń beti men qoly 25 paıyzǵa kúıip qalǵan. TJD qyzmetkerleri jarylys sebebin anyqtap jatyr.
Aıta keteıik, kólik suıytylǵan gazben júrgen.
