Aqtóbede fýtbol oıynyn tamashalaýǵa kelgen jankúıerler kúı de tyńdap qaıtty
AQTÓBE. QazAqparat - Ulttyq dombyra kúnine oraı «Aqtóbe» - «Shahter» komandalarynyń kezdesýi aldynda 500 aqtóbelik kúı tartty, dep habarlaıdy QazAqparat tilshisi.
Aqtóbe oblysynda Ulttyq dombyra kúnine oraı 300-ge jýyq merekelik shara ótti. Bazarlar men oıyn-saýyq keshenderinde, qoǵamdyq kólikterde jastar kúı tartyp, kitaphana qyzmetkerleri arnaıy kórme uıymdastyrdy.
«Kitaphana qoryndaǵy dombyra tarıhy, jasalý joldary týraly tanymdyq kitaptar kórmege qoıyldy. Sonymen qatar, kúı jazylǵan dıskter men ataqty kúıshilerdiń ómir joly jazylǵan kitaptar shyǵaryldy. Notalar da bar. Aqtóbelikter kitaptardy satyp alýǵa asyqty. Keıbiri kitaphanadaǵy kitap qorymen tanysyp, arnaıy kelip oqıtynyn jetkizdi. Bizdegi eń qundy kitap qazaqtyń myń kúıi jazylǵan dısk jınaǵy bolyp tur. Mýzyka mektebi, kolledjinen, fılarmonııadan kelip, tyńdap, tanysady»,- dedi S.Báıishev atyndaǵy oblystyq kitaphana qyzmetkeri Aqbaıan Qoıshyǵalıeva.
Búgin Qobylandy batyr atyndaǵy ortalyq stadıonda «Aqtóbe» - «Shahter» komandalary kezdesti. Oıyn bastalmas buryn óner mektepteriniń, qalalyq orta mekteptiń oqýshylary, mýzykalyq kolledjdiń stýdentteri qolyna domyra alyp, Ahmet Jubanovtyń «Bı» kúıin, Qurmanǵazynyń «Adaı» jáne «Balbyraýyn» kúılerin oryndady.
Aıta keteıik, «Aqtóbe» - «Shahter» oıyny 2:0 esebimen aıaqtalyp, «Aqtóbe» óz alańynda jeńiske jetti.
