Aqtóbede fýtbol akademııasy salynyp jatyr

AQTÓBE. QazAqparat – Aqtóbede 7-17 jastaǵy daryndylardy iriktep, jarystarǵa daıyndaıtyn fýtbol akademııasy salynyp jatyr, dep habarlaıdy QazAqparat tilshisi.

«Bizdiń qalada fýtbol keń tanymaldylyqqa ıe, jankúıerleri kóp. Sondaı-aq, biz balalar men jasóspirimderge arnalǵan sport alańdarynyń sanyn arttyryp, buqaralyq sportty damytý jumystaryn jalǵastyrýymyz kerek. Bul – Memleket basshysynyń tikeleı tapsyrmasy. Tek kásibı sportqa ǵana emes, sonymen qatar buqaralyq sportqa da jaǵdaı jasaý kerek», - dedi qurylys barysymen tanysqan Ońdasyn Orazalın.

Fýtbol akademııasy «Hımık» stadıonynyń janynan salynyp jatyr. Akademııa ǵımaraty eki qabatty ákimshilik-turmystyq korpýstan turady. Jattyǵý zaly, em-dom bólmesi, akademııa tyńdaýshylaryna arnalǵan jataqhana, sonymen qatar kúmbez ispetti tóbe jabyndysy qaralǵan. Munda jyl boıy jattyǵýmen aınalysýǵa bolady.

Qurylys keler jyldyń mamyr aıynda aıaqtalyp, qoldanysqa beriledi. Eger eki qabatty ǵımaratty turǵyzýǵa arnalǵan materıal Slovakııadan bıyl qyrkúıek aıynda ákelinse, nysandy erte paıdalanýǵa berýge de múmkindik bar.

Oblys ákimi Ońdasyn Orazalın sport nysanynyń mańyzdylyǵyn atap ótip, jumysty sapaly oryndaýdy tapsyrdy. Sondaı-aq, oblys ákimi «Hımık» stadıonynda júgiretin aqtóbelikter úshin arnaıy jol salý qajettigine nazar aýdardy.