Aqtóbede fızıka men matematıka muǵalimderiniń kóbi zeınet jasyna jaqyndap qalǵan
AQTÓBE. QazAqparat - Aqtóbe oblysynda fızıka, matematıka pánderiniń muǵalimderi tapshy. Sonymen qatar, orys tili páninen sabaq beretin mamandar az, dep habardaıdy QazAqparat tilshisi.
Aqtóbe oblysynyń bilim salasyndaǵy baqylaý departamentiniń basshysy Janat Qaıshyǵulovanyń aıtýynsha, Aqtóbe oblysy boıynsha pedagogtar tapshylyǵy bar. Memlekettik attestatsııadan ótken mektepter boıynsha óńirdegi 75 mektepke áli de 200-den astam maman qajet eken. Oblys ortalyǵyndaǵy №26 mektepte 7 maman óz salasy boıynsha bilim almaı, sabaq berip júr. Aqtóbe úshin orys tili pániniń muǵalimderi tapshy.
«Qazaǵy basym Baıǵanın, Yrǵyz aýdandarynda orys tilinen sabaq beretin muǵalim az. Ol aýyldyń jastary bul salaǵa baryp, bilim alǵan emes. Bul birneshe jyldan beri baıqalyp kele jatqan úrdik. Sonymen qatar, fızıka, matematıka pánderinen sabaq beretin ustaz az. Bul eki pán boıynsha sabaq beretinderdiń kóbi zeınet jasyndaǵy ustazdar», - dedi J.Qaıshyǵulova.
Talapkerler de muǵalimdik mamandyqty nemquraılylyqpen tańdaıdy eken.
«UBT kezinde eń tómengi ball jınaǵan balalar joǵary oqý oryndaryn tańdaǵanda tizimniń sońyna pedagogıkany jazady. «Muǵalim bola salaıynshy» degen oımen keledi. Qazirgi kezde muǵalimderdiń mártebesin kóterý úshin kóp jumys atqarylyp jatyr. Kóbi jumysy qıyn, aılyǵy az degen sebepter aıtady. Aldaǵy ýaqytta biz osy kemshilikterdi joıý jumystaryn qolǵa alýymyz kerek», - dedi J.Qaıshyǵulova.
