Aqtóbede FIFA standartyna saı balalarǵa arnalǵan fýtbol kesheni ashyldy
ASTANA. QazAqparat - Aqtóbede alańy 8 myń sharshy metrlik balalarǵa arnalǵan fýtbol-jattyǵý kesheni ashyldy, dep habarlaıdy QazAqparat oblys ákimdigine silteme jasap.
Nysan memlekettik-jekemenshik seriktestik aıasynda júzege asyryldy. Ol jıyrma jyldan astam ýaqyt boıy ıesiz turǵan fabrıka ǵımaratyna ornalasty. Ony qaıta qalpyna keltirýge, fýtbol alańdaryn ornalastyrýǵa, tehnıkalyq jəne ózge de jóndeý jumystary úshin ınvestor 300 mln teńge bóldi. Endi munda kún saıyn 500-ge tarta bala sportpen shuǵyldana alady.
Keshenniń ashylýyna oblys əkimi Berdibek Saparbaev qatysty.
«Qazaqstanda, sonyń ishinde Aqtóbede fýtboldy damytýǵa erekshe kóńil bólinedi. Bul máselede balalar men jasóspirimder fýtbolyn damytýdyń qanshalyqty mańyzdy ekenin túsinemiz jəne oblystyń barlyq eldi mekenderindegi balalardyń fýtbol oınaýǵa múmkindikteri bolǵanyn qalaımyz. Sonda ǵana biz daryndardy anyqtap, tanymal sport túriniń otandyq juldyzdaryn ósire alamyz. Osy maqsatta oblystyń barlyq aýdandarynda 2016 jyldan bastap "Aqtóbe" fýtbol klýbynyń bólimsheleri ashyldy. Sport ınfraqurylymdaryn damytý jalǵasyp jatyr. Bir jyl buryn munda ıesiz turǵan ǵımarat bolatyn, al búginde bes fýtbol alańy ornalasqan. Biz fýtboldy ərqashan qoldap keldik jəne qoldaýdy jalǵastyramyz»,-dedi aımaq basshysy.
Óńirdegi fýtboldy qoldaýǵa jeke ınvestorlar da nıetti. Memleket olarǵa óz tarapynan memlekettik-jekemenshik seriktestiktiń mehanızmderi arqyly barynsha qoldaý kórsetýde.
«Bul nysan bes birdeı alańy bar jáne FIFA-nyń halyqaralyq standarttaryna sáıkes keletin Qazaqstandaǵy jalǵyz jabyq kesheni. Keleshekte munda tek jas fýtbolshylardy jattyqtyryp qana qoımaı, túrli jarystar da ótkizýge bolady», - dep atap ótti jeke ınvestor ókili Asqarbek Mamyrbaev.
Oblystyq sport jəne dene shynyqtyrý basqarmasynyń məlimetinshe, 2016 jyly oblysta fýtbolmen aınalysatyn 8 myńdaı bala bolǵan. Qazirgi tańda olardyń sany 12 myń balaǵa artty. Byltyr óńirde barlyǵy 32 fýtbol alańy ashylǵan.
