Aqtóbede evakýatsııalanǵan qala turǵyndary mektepterge ornalastyryldy
AQTÓBE. KAZINFORM – Aqtóbe qalasy mańyndaǵy baý-baqsha ujymdaryn sý basyp, turǵyndar evakýatsııalandy. Olar qazir mektepterge ornalastyryldy.
Aqtóbe qalasy boıynsha 73 úıge sý kirý deregi anyqtaldy. Saldarynan 155 adam evakýatsııalyq pýnktke ornalastyryldy. Qazir qala boıynsha 18 evakýatsııalyq pýnkt 4 myńnan astam adam qabyldaı alady. Qala ákiminiń orynbasary Juldyzbek Bısembınniń aıtýynsha, kóbi týma-týysyna ornalasqan. Turǵyn úılermen qatar №8, 18, 63, 72 mektepterdiń, 1 memlekettik, 2 jeke balabaqsha jertólesi men Órleý turǵyn alabyndaǵy ambýlatorııaǵa sý kirdi.
M.Arynov atyndaǵy Qarǵaly qazaq orta mektebinde qazir 100-ge jýyq adam ornalasqan. Olar baý-baqsha ujymdarynyń turǵyndary. Bári de sońǵy sátke deıin úmittenip, jaǵdaıdy baqylaǵanymen, keshe keshkilik úılerine sý kirip ketken.
«Qazirgi málimet boıynsha bizde 97 adam keldi. Onyń 59-y bala. Qazirgi tańda jatyn oryn berildi. Mektep ashanasy jumys istep tur. Olarǵa demeýshiler qajetti zattardy ákelip jatyr. Gıgıenalyq zattary da bar. Mektep tarapynan qosymsha oıyn bólmeleri uıymdastyryldy», - dedi M.Arynov atyndaǵy Qarǵaly qazaq orta mektep dırektory Jasulan Janaıdarov.
Orta mektep negizi 45 oryndy ázirlegen, degenmen adam sany kúrt óskende ózge bilim ordalarynan tósek-oryn jetkizildi.
«Qarǵaly baý-baqsha ujymynan keldik. Negizi 26 naýryz kúni túnde sý júrip, 27-i tolyp ketti. Qazir úıim sýda tur. Sý deńgeıi terezege kelgen. Úıim osymen úshinshi ret sýǵa ketti. 2017, 2023 jyldary ketip, bıyl qaıtalandy. Byltyr syz basyp, turý qıyndady. Otbasymda úlkenim – stýdent, qyzym – oqýshy. Balam Almatyda oqýda. Joldasym tórteýmiz turamyz. Bıyl tek zattarymdy shatyrǵa shyǵardym, al tehnıkanyń bári sýda qaldy», - dedi Janargúl Іzimova.
Baspanasy sýda qalǵan qala turǵyndary tótenshe jaǵdaı jarııalanǵanyn qalaıdy. Sonymen birge úıdi kóshirýdiń tıimdi jolyn kútedi.
«Syrtymyz kúlip otyrǵanymen, janymyz aýyrady. Jınap-tergenniń bári sýǵa ketti. Ydys-aıaq, kórpe-jastyq sýda tur. Ne isteımiz? Ne jaýap bar? Oblys ákimi, qala ákimi kelse eken. Halyqtyń jaǵdaıy ne bolady? Eki kún otyramyz, úshinshi kúni baspanamyzdy oılap ketemiz. Aldymen 2017 jyly sýǵa kettik. Sodan beri júıke aýrýyna dýshar boldyq. Balalar bolsa bronh aýrýyna shaldyqty. Aıaq-qoly syrqyraıdy úlkenderdiń. Biz tótenshe jaǵdaı jarııalaýdy, halyqty sýǵa ketpeıtin jerge ornalastyrýdy suraımyz. Eń bolmasa bir úıge jetetin qurylys materıalyn berse eken. Bizge jer usyndy, biraq eski úıdi buzyp, sonda sal dep otyrady. Ol jaramsyz búginde», - dedi Shynyrgúl Akbalıeva.
Aıta keteıik, evakýatsııalanǵan adamdarǵa psıhologııalyq kómek kórsetý de qarastyrylǵan.
Aıta keteıik, Aqtóbedegi Temir aýdanynda tótenshe jaǵdaı jarııalandy.