Aqtóbede Eýroodaqqa júk tasymaldaıtyn áýe habyn qurýǵa daıynbyz — Qasym-Jomart Toqaev
ASTANA. KAZINFORM — Prezıdent Qasym-Jomart Toqaev Táýelsizdik saraıyndaǵy «Ortalyq Azııa-Qytaı» sammıtinde qytaılyq ınvestorlardy transshekaralyq ózenderdiń sý joly arqyly logıstıkany birlesip damytýǵa shaqyrdy.
— Keleshekte qytaılyq seriktesterimiz transshekaralyq ózenderdiń sý joly arqyly tasymaldy damytýǵa qatysatynyna úmit artamyz. Qazaqstannyń batys bóligindegi Aqtóbe qalasynda taýarlardy Eýropalyq Odaq elderine áýe kóligimen tranzıtteýge arnalǵan júk avıahabyn qurýǵa daıynbyz, — dedi Memleket basshysy.
Qasym-Jomart Toqaev Qazaqstan men Qytaı arasyndaǵy saýdany birneshe ese arttyratyn basqa da aýqymdy jáne perspektıvaly kólik-logıstıkalyq jobalar bar ekenin eske saldy.
— Bul máselelerdiń bári muqııat pysyqtaýdy talap etedi. Sondyqtan kólik-logıstıkalyq dálizderdi damytýdyń keshendi strategııasyn ázirleý úshin saraptamalyq platforma qurý, sondaı-aq taýarlardy jedel kedendik resimdeýdi engizýdiń Jol kartasyn qabyldaý qajet dep sanaımyz, — dedi Prezıdent.
Aıta keteıik, elordadaǵy Táýelsizdik saraıynda «Ortalyq Azııa — Qytaı» ІІ sammıti ótip jatyr. Іs-sharaǵa Memleket basshysy Qasym-Jomart Toqaev, QHR tóraǵasy Sı Tszınpın, Ózbekstan Prezıdenti Shavkat Mırzıeev, Qyrǵyzstan Prezıdenti Sadyr Japarov, Túrikmenstan Prezıdenti Serdar Berdimuhamedov jáne Tájikstan Prezıdenti Emomalı Rahmon qatysyp otyr.
«Ortalyq Azııa — Qytaı» І sammıti 2023 jyldyń 19 mamyrynda Qytaıdyń Sıan qalasynda ótken edi.