Aqtóbede etnomádenı birlestik ókilderi bas qosty
Aqtóbeniń Qazaqstan halqy Assambleıasy ǵımaratynda óńirdegi etnomádenı birlestik ókilderi bas qosty. Jıynda qazaqstandyq patrotızm men birtektilikti berik ornatý jáne etnosaralyq kelisimdi qamtamasyz etý jaıy aıtyldy. Sharaǵa 17 etnomádenı birlestik ókili men «Jańǵyrý joly» qozǵalysynyń músheleri, QHA janyndaǵy keńesterdiń músheleri, «Qoǵamdyq kelisim» qyzmetkerleri qatysty.
«Etnosaralyq kelisimniń qazaqstandyq modelinde memlekettik til kópultty qoǵam birliginiń kórsetkishinde rýhanı ári psıhologııalyq turǵyda mańyzdy ról atqarady. Memlekettik tildi meńgerý arqyly qazaq jerinde ómir súretin barlyq etnos ózin tutas Qazaqstan qoǵamynyń quramdas bir bóligi bolýǵa rýhanı turǵyda daıyn ekendikterin, bolashaǵy Qazaqstan halqymen etene baılanysty ekenin kórsetedi. Sol sebepti de bolashaǵyn Qazaqstan halqymen tyǵyz baılanystyrýǵa degen umtylystyń shynaıy rýhanı daıyndyǵyn anyqtaıtyn basqadaı naqty ári aıqyn kórsetkishtiń bolýy múmkin emes. Osylaısha táýelsiz Qazaqstannyń irgetasy elimizdiń aýmaǵynda ómir súretin barlyq etnostarǵa ortaq mádenı jáne rýhanı qundylyqtarmen negizdelgen», - dedi Halyqaralyq «Qazaq tili» qoǵamy Aqtóbe oblystyq uıymy tóraǵasynyń orynbasary Jańǵabyl Qabaqbaev.
Aqtóbe oblysyndaǵy etnomádenı birlestikterdiń bári Qazaqstan halqy Assambleıasy ǵımaratynda óz ulttyq óneri men mádenıetin damytyp otyr. Qajet kezde jeksenbilik mektepter de jumys isteıdi. Olar ulttyq salt-dástúrdi saqtaýǵa, tilin damytýǵa múmkindik alǵanyna qýanyshty.
«Qazir Assambleıa 2020 jylǵa deıingi damý tujyrymdamasyn júzege asyrýda. Osylaı jyldar ótken saıyn QHA-nyń qoǵamdyq-saıası mańyzy arta berdi, ol týraly kóptegen zertteýler jazyldy, júzdegen maqalalar men tolymdy eńbekter jaryq kórdi. Bizdiń elimizde 100-den asa etnos ókili turyp jatyr. Assambleıa osy etnostardyń etnomədenı birlestikterin quryp, olardyń qyzmeti men maqsattaryn Qazaqstan halqy birliginiń saqtalýyna jumyldyryp otyr. Qazir osyndaı etnomədenı birlestikterdiń sany 820-ǵa jetti. Assambleıa músheleriniń sany 400 adam bolǵanymen, onyń belsendi jaqtaýshylary 70 myń adamǵa jýyq. Olar uıymdastyrǵan túrli sharalarǵa, merekelik qoıylymdarǵa jyl saıyn 3 mıllıonnan astam adam qatysady», - deıdi «Qoǵamdyq kelisim» KMM qoǵamdyq-buqaralyq is-sharalardy uıymdastyrý bóliminiń sarapshysy Túlkibaı Saparov.
