Aqtóbede esirtki jasyrýshy óz-ózin polıtsııaǵa ustap berdi
AQTÓBE. KAZINFORM – Aqtóbelik áleýmettik jeli arqyly esirtki jasyryp, satqany úshin bas bostandyǵynan aıyryldy. Ol úıine bógde bireý kirmek boldy dep kúdiktenip, qorqyp, eki ret polıtsııa shaqyrǵan. Polıtsııa sottalýshynyń áreketinen sekem alyp, tintý kezinde esirtki zatyn tárkiledi.
Іs Aqtóbe oblystyq qylmystyq ister jónindegi mamandandyrylǵan aýdanaralyq sotynda qaraldy. Sottalýshyǵa Qylmystyq kodekstiń «Adamdar tobynyń aldyn ala sóz baılasýymen, elektrondyq aqparattyq resýrstardy paıdalaný arqyly psıhotroptyq zattardy asa iri mólsherde ótkizý maqsatynda zańsyz ıemdený, saqtaý» baby boıynsha aıyp taǵyldy. Aıyptaý aktisine súıensek, Qarǵaly aýdany Badamsha aýylynyń 24 jastaǵy turǵyny 2022 jyly jumys izdep júrip, saıttan kýrer vakantsııasyn keziktiredi. Onda Telegram messendjeriniń «Maks» akkaýntyna kezigip, eskirtki zattaryn jasyrýshydan saqtaýshyǵa aınalady. Sóıtip 2023 jyldyń sáýir aıynda sottalýshy tańerteń bireýdiń esik qaqqanyn, sol úshin de polıtsııa shaqyrǵanyn, al quqyq qorǵaýshylar kelgende eshkimniń anyqtalmaǵanyn, keshke dál osy jaǵdaı qaıtalanyp, qaıtadan 102-ge qońyraý shalǵanyn, onda da eshkimdi tappaǵanyn aıtty.
Sottalýshy polıtsııa kirgen kezde eskirtki zaty bar sómkeni terezeden syrtqa laqtyryp jibergen. Polıtsııa tergep-tekserý kezinde 38 zıp-paket, 41 dana kapsýla, 180 oramany tabady. Onda salmaǵy 342,22 gramm Alfa–PVP, 7,48 gramm mefedron boldy. Sot otyrysy kezinde sottalýshy kinásin moıyndamady ári eskirtkini ózi tutynǵanyn aıtty.
«Sot otyrysynda prokýror aıypty tolyq qoldap, sottalýshyǵa 10 jyl bas bostandyǵynan aıyrý jazasyn taǵaıyndaýdy surady. Sottalýshy kinásin moıyndamaı, ózi jáne onyń qorǵaýshysy is-áreketin QK-tiń 296-babynyń 4-bóligine, ıaǵnı, psıhotroptyq zattardy asa iri mólsherde ótkizý maqsatynsyz zańsyz ıemdený, saqtaǵan dep qaıta dárejeleýdi surady. Sotta sottalýshynyń qylmystyq jaýaptylyq pen jazasyn jeńildetetin mán jaılar dep qylmysty alǵash ret jasaýyn tanydy. Sot úkimimen T Qylmystyq kodekstiń 297-baby 3-bóliginiń 1,3,5-tarmaqtarymen kináli dep tanylyp, oǵan 10 jyl merzimge bas bostandyǵynan aıyrý jazasy taǵaıyndaldy», - dep habarlady Aqtóbe oblystyq sotynyń baspasóz qyzmeti.
Sot úkimi zańdy kúshine engen joq.