Aqtóbede esirtki saýdasy: 22 karta arqyly 400 mln teńgeden astam qarjy ótken
ASTANA. KAZINFORM – Qarjylyq monıtorıng agenttiginiń Aqtóbe oblysy boıynsha departamenti esirtki satatyn ınternet-dúken úshin tólem qabyldap, aqsha aýdarýmen aınalysqan qylmystyq toptyń jolyn kesti.
Tergeý dereginshe, Aqtóbe qalasynyń turǵyny áleýmettik jelilerde aqsha aıyrbastaıtyn top quryp, oǵan jeti sybaılasyn tartqan. Top músheleri mindetterdi ózara bólisip, kúndizgi jáne túngi aýysymmen jumys istegen. Osylaısha olar táýlik boıy tólem qabyldap, aqsha aýdaryp otyrǵan.
Internet-dúken operatorlary tapsyrys aqysyn tóleý úshin satyp alýshylardy osy aıyrbastaý tobyna baǵyttaǵan. Tólem rastalǵannan keıin olarǵa esirtki jasyrylǵan oryndardyń koordınattary jiberilgen.
Aıyrbastaý toby kún saıyn 50-den 70-ke deıin tólem operatsııasyn júrgizgen. Aqsha qabyldaý úshin ózge adamdardyń — dropperlerdiń atyna ashylǵan 22 bank kartasyn paıdalanǵan.
Keıin túsken aqshany krıptovalıýtaǵa aıyrbastap, esirtki saýdasyn basqaratyn adamdardyń baqylaýyndaǵy krıptoámııandarǵa aýdaryp otyrǵan.
Aýdarylǵan aqshanyń jalpy kólemi 918 myń USDT-den asqan. Bul 400 mln teńgeden astam somaǵa teń.
Qylmystyq áreketti uıymdastyrǵan adam qamaýǵa alyndy.
Tergeý jalǵasyp jatyr.
Qazaqstan Respýblıkasy Qylmystyq-protsestik kodeksiniń 201-babyna sáıkes ózge málimetter jarııa etilmeıdi.
Aıta ketelik Kaspııde 88 shaqyrym brakonerlik aý men 11,5 keli esirtki tárkilengen edi.
