Aqtóbede esirtki daıyndap, adam óltirgen mektep muǵalimi sottaldy

AQTÓBE. KAZINFORM – Aqtóbede mektep muǵalimi men tis tehnıgi esirtki zattaryn daıyndap, adam óltirgeni úshin 19 jylǵa sottaldy. Árqaısysy jábirlenýshiniń otbasyna 10 mln teńgeden moraldyq ótemaqy tóleýi tıis.

Aqtóbe oblystyq qylmystyq ister jónindegi mamandandyrylǵan aýdanaralyq sotynda Ábish Kekilbaev atyndaǵy № 72 jalpy bilim beretin orta IT mektep-lıtseıiniń muǵalimi men tis tehnıgine qatysty qylmystyq is qaraldy. Ekeýine «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» jáne «Adam óltirý» baptary boıynsha aıyp taǵyldy. Іs materıalyna súıensek, mekteptiń tarıh pániniń muǵalimi Darhan Jetpisbaev pen tis tehnıgi Meırambek Súıinǵarın 2023 jyldyń naýryz aıy men 2024 jyldyń 13 qańtar aralyǵynda garajdy jalǵa alady. Sonda jasyryn laboratorııa jumysyn júrgizedi. Olar mefedrondy zańsyz daıyndaǵan jáne saqtaǵan. Endi satý jolyn oılastyryp, tanystaryn shaqyrady. Bireýi birden bas tartyp, ekinshisi kelisedi. Alaıda eki uıymdastyrýshy qylmysy áshkere bolady dep qorqyp, jábirlenýshi Toqmýrzındi aldap shaqyrady. Keıin pyshaqtap, óltiredi. 

— Darhan Jetpisbaev aıypty dep tanyp, túpkilikti 19 jyl bas bostandyǵynan aıyrý jazasy taǵaıyndalsyn. Jazasyn qylmystyq atqarý júıesiniń qaýipsizdigi ortasha mekemesinde ótesin. Meırambek Súıinǵarın aıypty dep tanylyp, 19 jyl bas bostandyǵynan aıyrý jazasy taǵaıyndalsyn. Jazasyn qylmystyq atqarý júıesiniń qaýipsizdigi ortasha mekemesinde ótesin, — dedi sýdıa Nurlan Baqtyǵalıev.

Sondaı-aq sottalýshylardyń árqaısysy jábirlenýshi tarapqa 10 mln teńgeden moraldyq ótemaqy tóleýi tıis.

Aqtóbede kolledj bilim alýshylarynyń otyrysy sátsiz aıaqtaldy. Úıge kirmek bolǵan jigittiń aldynan pyshaq ala shyqqan qyzdy polıtsııa anyqtap, bólimge jetkizdi.