Aqtóbede esirtki saýdasymen aınalysqan adamnan 7 keli marıhýana tárkilendi
Aqtóbe oblystyq polıtsııa departamenti esirtki qylmysyna qarsy is-qımyl basqarmasynyń qyzmetkerleri Grıshın kóshesindegi aýlalardyń birinen 44 jastaǵy er adamdy toqtatty.
Tekserý kezinde odan esirtki zaty bar 35 polıetılen túıinshegi tárkilendi. Saraptama kórsetkendeı, tárkilengen zat-salmaǵy 2 keliden asatyn marıhýana.
Sondaı-aq ustalǵan adam esirtkilik masań kúıde bolǵan.
«Ári qaraı tergeý áreketterin júrgizý barysynda ustalǵan adam bul zatty tanys adamynan alǵanyn túsindirdi. Esirtki satýshynyń turǵylyqty jeri boıynsha tintý barysynda qyzmettik ıttiń kómegimen polıtsııa qyzmetkerleri balkonnan 7 keliden astam marıhýanaǵa uqsas zatty tárkiledi. Osy oqıǵa boıynsha Qylmystyq kodekstiń «Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý» jáne «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý, jóneltý ne ótkizý» baby boıynsha sotqa deıingi tergeý bastaldy. Kúdiktiniń kinási dáleldense, satýshynyń múlikti tárkilenip, bes jyldan on jylǵa deıingi merzimge bas bostandyǵynan aıyrylýy múmkin», - dep habarlady oblystyq PD baspasóz qyzmetiniń jetekshisi Erbolat Sarqulov.
Aıta keteıik, tárkilengen esirtki zatynyń qara naryqtaǵy quny 3 mln teńgeden asady.
Tárkilengen esirtki zaty 19 myńnan astam bir rettik dozany qurady.
