Aqtóbede Eset batyrdyń 355 jyldyǵyna oraı aqyndar aıtysy ótip jatyr
Aqtóbede Eset batyrdyń 355 jyldyǵyna oraı Alǵa aýdany Bestamaq aýylynda túrli mádenı-tanymdyq kesh ótti. Sporttyq jarystar uıymdastyryldy. Al qazirgi kezde Stýdentter saraıynda aqyndar aıtysy ótip jatyr. Oǵan respýblıkamyzdyń jer-jerinen kelgen 10 aqyn, Aqtóbe óńirinen 6 aqyn qatysty.
«Maqsaty − aıtys ónerin mádenıetimizdiń baǵa jetpes asyl murasy retinde halyqqa jan-jaqty nasıhattaý, ulttyq ónerimiz arqyly tarıhymyzdyń dańqty paraqtaryn, eldik jolynda aıanbaı ter tókken asyl babalarymyzdy ulyqtaý. Jas aqyndardyń sheberligin shyńdaı túsip, kópshilikke tanylýyna múmkindik jasaý, sondaı-aq óńirdegi aıtys mektebiniń shyǵarmashylyq áleýetin nasıhattaý negizgi mindet»,- dedi oblystyq halyq shyǵarmashylyǵy úıiniń ókili Gúlnar Seıtalına. Respýblıkalyq aıtysta Qanat Myrzahanuly (Jambyl oblysy), Nurlan Musaev (Mańǵystaý oblysy), Rústem Qaıyrtaı (Abaı oblysy), Shuǵaıyp Sezimhan (Almaty q.), Serik Qýanǵan (Shyǵys Qazaqstan obl.), Birjan Baıtýov (Shymkent q.), Aıdos Rahmetov (Qyzylorda obl.), Qazyret Berdihan (Almaty q.), Shalqarbaı Іzbasarov (Atyraý obl.), Raýan Qaıdarov (Astana q.) jáne aqtóbelik aqyndar Juldyz Qojabekova, Marat Ahmetov, Ershat Qaıboldın, Jánibek Beıbitov, Aıbolat Kóshkinbaev, Nurbol Jaýynbaev óner kórsetti. Aıtyskerlerdiń ónerine Qazaqstannyń halyq ártisi, Memlekettik syılyqtyń laýreaty Asanáli Áshimov bastaǵan qazylar alqasy tórelik etti.
Aıtysty Júrsin Erman júrgizdi.
Aqyndar Eset Kókiulynyń erligin aıtyp, tarıhı derekterdi mysalǵa keltirdi. Aqtóbe jerinde týyp-ósken tulǵalardyń eńbegin de sózben órnektedi. Sonymen birge Dımash Qudaıbergenniń ónerin, Almatyda ótken kontserti, qazaq ulynyń jetistigi aıtyldy.
Aıtys erteń jalǵasady.
