Aqtóbede esepshi muǵalimderge 51 mln teńgeden astam qarjyny artyǵymen aýdaryp jibergen

AQTÓBE. KAZINFORM – Buzýshylyqty oblystyq memlekettik ishki aýdıt departamenti anyqtady.

Shalqar aýdanyndaǵy №5 mektep lıtseıinde aýdıtorlyq tekserý júrgizildi. Nátıjesinde 51 400 000 teńge bolatyn buzýshylyq deregi anyqtaldy.

- Mektep esepshisi muǵalimderge eńbekaqyny artyǵymen tólegen. Byltyr 19 mln teńge, al bıyl 32 400 000 teńgeniń buzýshylyqtary anyqtaldy. Muǵalimder aqshany byltyr túgel qaıtardy. Bıyl da qaıtarǵanyn aıtyp, túbirtek tapsyrdy. Alaıda bıýdjetke túsip, túspegenin naqtylaımyz. Bıyl «Onlaın bıýdjettik monıtorıng» qosymshasy iske qosylyp, qazir sol arqyly tekserý júrgiziledi. Bul memlekettik, bıýdjettik mekemelerge barmaı-aq qashyqtan baqylaýǵa múmkindik beredi, - dedi Aqtóbe oblystyq memlekettik ishki aýdıt departamentiniń basshysy Sáken Qasymov.

Sonymen birge ishki aýdıtke Joǵarǵy sport sheberligi mektebinen shaǵym tústi. Onda bapkerler issaparǵa barmaı-aq jalaqymen qatar qosymsha aqsha alǵany anyqtaldy. Shyǵyn – 3,4 mln teńge. Tekserý kezinde Aqtóbe oblystyq memlekettik ishki aýdıt departamenti Shymkent qalasyna suranys jiberip, aqtóbelik quramanyń oqý-jattyǵýǵa múlde qatyspaǵanyn bildi.

Aıta keteıik, bıyl birinshi jartyjyldyqta 76 aýdıtorlyq tekserý júrgizildi. Barlyǵy 75 laýazymdy tulǵaǵa qatysty 150 ákimshilik is qozǵalyp, 12 mln teńge aıyppul salyndy. Al 99 laýazymdy tulǵa tártiptik jazaǵa tartyldy.

Eske salsaq, Shalqar aýdandyq Sáýlet, qurylys jáne qala qurylysy bóliminiń basshysy eki merdigerden mıllıondap para alǵany úshin aıyptalyp jatyr. Biri sý jelilerin qaıta jańǵyrtý, ekinshisi turǵyn úıge ınjenerlik ınfraqurylym tartý jobalarynyń merdigeri.