Aqtóbede esekmııadan ýlanǵan taǵy 250 bas iri qara kofeıniń arqasynda aman qaldy

«Jaz aılarynda maldy jaıylymǵa jiberemiz. Bul joly uryqtandyrýǵa daıyndap, kútim jasadyq. Barlyǵy sharýashylyqta 12 myń bas iri qara bar. Onyń 6800-i analyq. Kanadadan uryq ákelip, tájirıbe ótkizýdi josparlap edik. Sol úshin de shildede kanadalyq maman kelip, qashardy qarap, uryqtandyrýǵa daıyndady. Ár uryq quny - 300 myń teńge. Buqa alý úshin bastaǵan jumysymyzdy qaıta jalǵastyramyz. Almaty men Atyraýdan sharýalar kelip, 170 bas mal alamyz degen soń karantınge qoıyldy. Mine, karantınde turǵan jáne uryqtandyrýǵa daıyndalyp jatqan iri qara ýlanyp qaldy. Bári Angýs tuqymdy mal. Soıyp, 121 bas mal Alǵa qalasyna jiberildi. Al 132 bas mal eti buzylyp ketip, órteldi»,- dedi «Aktep» JShS-niń dırektory Orazaq Samuratov.

Oqıǵa 18 tamyz kúni saǵat 19:00-de bastaldy. Sharýashylyq jumysshary túni boıy mal soıyp, ózgesiniń kózin joıýǵa týra keldi.

«Sol kúni túske deıin eski shóp berilip, tústen keıin sharýashylyqtar oryp ákelgen azyq tastaldy. Keshki saǵat 19:00-den bastap mal qulady. Aram ólip qalmasyn dep soıdyq. Oqys jaǵdaıda asqazandy jýý múmkin bolmady. Túngi 3:00-ge deıin soıyldy. Tańǵy saǵat 6:00-da qaıta kelip, ınternetten málimet izdedik. Sýǵa krahmal ezip bergenimizben, ishpedi. Keıin mal dárigerimen aqyldasyp kofeın, glıýkoza, kaltsıı gıdrohlorıdin egip, aýzyna ezilgen krahmal quıyldy. Arada 2 mınýt ótkende tura bastady. Alǵashyn qaı dáriniń áser etkenin bilmedik. Baqylaýdan soń kofeın áseri bar ekenin bilip, dereý satyp aldyq. Shamamen 250 bas maldy aman alyp qaldyq. Infektsııa joq, biraq órtedik. Maldyń baýyr, asqazany ósip, ishegi qantalap ketken. Ol ýlaný belgisi. Zerthana ýlanýdy rastady»,- dedi dırektor.
 

Aıta keteıik, barlyǵy 40 sharýashylyq shóp tasıdy. Sol kúni 8 sharýashylyq shóp ákelgen. Olardyń qaı jerden shóp shapqany anyqtalyp jatyr.

«Soıyp qaraǵan kezde asqazanynda esekmııanyń dáni tolyp turdy. Qazir jaǵdaı turaqty. Eshqandaı ınfektsııa joq. Biraq kúdik bolǵan soń tekserý qajet bolyp, polıtsııaǵa aryz jazdym. Qastandyq ta jasalýy múmkin degen joramal boldy. Aldaǵy ýaqytta Sibir jarasy, ınfektsııa dep jalǵan aqparat taratqan adamdardy sotqa beremiz. Et satyldy degen de jalǵan aqparat. Sanıtar mamandar, mal dárigeri men sharýashylyq ókilderi qatysyp, órtedi»,- dırektor.

Zertteý materıaldary 19 tamyz kúni qaraldy. Mamandar aldymen Sibir jarasynyń bar-joǵyn tekserdi.

«19 tamyz kúni keshkilik zertteýge materıal keldi. Dúısenbi kúni mamandardy jınap, tez arada dıagnoz qoıý qajet boldy. Aldymen Sibir jarasyna tekserildi. Eki saǵattan soń ol aýrýdyń joq ekenin anyqtap, toksıkologtar men taǵamnan ýlanýǵa jaýapty mamandar iske kiristi. Jumys kúniniń sońynda shópten ýlanǵany rastaldy. Negizi maldyń etin paıdalaný, ony joıý sharýashylyq ıesine baılanysty. Etin qaıta óńdeýge jiberýge bolady»,- dedi veterınarlyq laboratorııanyń oblystyq fılıal dırektory Safıýlla Zarmanov.

Elimiz boıynsha shópten ýlaný jyl saıyn bolady, biraq jappaı ýlaný múlde tirkelmegen.