Aqtóbede erteńnen bastap áleýmettik nysandarǵa jylý beriledi
AQTÓBE. KAZINFORM – Jylý aldymen balabaqsha, mektep, aýrýhana, ınternat úılerine beriledi. Al 15 qazannan bastap turǵyn úıler men qoǵamdyq ǵımarattar qamtylady.
«Aqtobe su-energy group» AQ baspasóz qyzmetiniń habarlaýynsha, búginde qalada jylytý maýsymyna daıyndyq jumysy aıaqtaldy. Barlyǵy 27 qazandyqqa aǵymdaǵy jóndeý jumysy júrgizildi. Sonymen birge jylý qubyrlary da aýystyryldy.
- Jylytý maýsymyna daıyndyq kezinde 29 ýchaskede 4,13 shaqyrymdyq jylý qubyry aýystyryldy. Onyń ishinde 1,83 shaqyrymy ınvestıtsııalyq baǵdarlama aıasynda jańǵyrtyldy. Al qalǵan 2,3 shaqyrymy kúrdeli jóndeý jumystary kezinde aýystyryldy. Keıin gıdravlıkalyq synaqtan ótkizilip, aqaýlar der kezinde qalpyna keltirildi. «Jergilikti memlekettik basqarý jáne ózin-ózi basqarý týraly» Zańyna, Aqtóbe oblysynda jylytý maýsymyna daıyndyq jáne ony ótkizý qaǵıdalaryna sáıkes 5 táýlik boıy ortasha temperatýra +10 °C jáne de odan da tómen bolsa jylý berý sheshimi qabyldanady. Aqtóbe qalasy boıynsha 2026 jyly 1 qazannan bastap mektepter, ınternat úıleri, mektepke deıingi jáne medıtsınalyq mekemelerge, 15 qazannan bastap turǵyn úıler men qoǵamdyq ǵımarattarǵa jylý beriledi, - dep habarlady «Aqtobe su-energy group» AQ baspasóz qyzmeti.
Aıta keteıik, Qazaqstannyń bes óńirinde jylytý maýsymy bastaldy. Aýa raıyna baılanysty osy aptanyń sońyna deıin taǵy bes óńirde jylý berile bastaıdy. Bul týraly Energetıka vıtse-mınıstri Qaıyrhan Tutqyshbaev Úkimet otyrysynda aıtty.
