Aqtóbede erlikpen qaza tapqan polıtsııa qyzmetkeriniń kabınetinde qaýipsizdik sabaǵy ótti
AQTÓBE. KAZINFORM – Aqtóbede qyzmettik mindettin atqarý kezinde erlikpen qaza bolǵan polıtsııa aǵa leıtenanty Rýslan Joldybaev oqyǵan mektepte qaýipsizdik erejeleri túsindirildi. Ári sýǵa batyp bara jatqan balany qutqarǵan oqýshyǵa qurmet kórsetti.
Búgin Aqtóbe oblysynda barlyq mektepte alǵashqy qońyraý saltanatty túrde ótti. Oǵan 1 jáne 11 synyp oqýshydary ǵana qatysty. Barlyǵy 18 020 bala birinshi synypqa qabyldandy.
Bilim kúni Aqtóbeniń barlyq mektebinde qaýipsizdik erejesi túsindirildi. Aqtóbe oblysy Polıtsııa departamentiniń bastyǵy Abaı Júsipov Aqtóbe qalasyndaǵy №13 orta mekteptiń alǵashqy qońyraý saltanatyna baryp, balalardy Bilim kúnimen quttyqtady.
Bul mektep – qyzmettik mindetin atqarý kezinde erlikpen qaza bolǵan polıtsııa aǵa leıtenanty Rýslan Joldybaev oqyǵan bilim ordasy. Jýyrda osy mektep qabyrǵasynda batyr-polıtseıdiń atyndaǵy arnaıy kabınet men polıtseı synybyn ashylǵan.
– Búgin balalar men ata-analardyń júrek tolqynysy men qýanyshy erekshe seziledi. Sebebi alǵashqy qońyraý árbir balaqaıdyń jańa álemge qadam basýyn, úlken, jarqyn ómir esigin ashýyn bildiredi. Árbir balaqaıǵa – qutty qadam, shýaqty ǵumyr, naızadaı namys pen jasymas jiger tileımiz. Olardyń qaýipsizdigi men jarqyn bolashaǵy úshin biz árdaıym kúzettemiz, - Abaı Júsipov.
Batyr-polıtseı Rýslan Joldybaev oqyǵan mekteptiń tárbıelenýshileri erjúrek aǵalarynyń izimen erlik jasap júrgenin atap kórsetip, byltyr jaz mezgilinde Elek ózenine batyp bara jatqan zamandasyn qutqarǵan 11 synyp oqýshysy Qolqanat Baqquldy, onyń ata-anasy men ustazdaryn marapattady.
Keıin osy mekteptegi Rýslan Joldybaev kabınetinde jas saqshylarymen birge 1 synyp oqýshylaryna sýretti boıamaly kitapshalar arqyly jol júrý erejelerin túsindirip, qaýipsizdik talaptaryn aıtyp berdi.
Eske salsaq, Qolqanat Baqqul byltyr zamandasyn qutqaryp qaldy. Ol sýdan shyǵarǵan boıda balaǵa alǵashqy medıtsınalyq kómek te kórsetken.
