Aqtóbede erlikpen qaza tapqan polıtseıler men áskerılerge kóshe ataýy berilýi múmkin
AQTÓBE. KAZINFORM — Qoǵamdyq tyńdaý kezinde usynys qoldaý tapty. Endi usynys Aqtóbe qalalyq máslıhatynda qaralady.
Aqtóbe qalalyq máslıhatynyń turaqty komıssııalarynda turǵyndardyń pikirin bilý úshin qoǵamdyq tyńdaý ótti. Onda Aqtóbe qalasynyń Almaty jáne Astana aýdandarynyń ataýsyz kóshelerine Aıdos Boranbaev, Nurlan Alpysbaı, Rýslan Joldybaev, Rýstem Kenjalın, Qymbatqazy Ýrazalın, Temirbek Jaqsylyqbaev, Berikjan Kalıev, Raqymjan Janabergenov, Sapar Dosbol esimderin berý týraly usynys qaralyp, daýysqa salyndy.
— Qazan aıynda ótetin sessııada qaladaǵy 34 kóshege ataý berý usynysy bekitiledi. Al kóshege erlikpen qaza tapqan áskerı, polıtsııa qyzmetkerleriniń esimin berý usynysy jeltoqsanda qaralaýy múmkin. Qoǵamdyq tyńdaý ótti. Qoǵamdyq tyńdaýǵa qatysqan azamattardyń daýys berý qorytyndysy boıynsha Aqtóbe qalasynyń Almaty jáne Astana aýdandarynyń keıbir ataýsyz kóshelerine ataý berý týraly barlyq usynys biraýyzdan maquldandy. Endi tek qalalyq máslıhat sessııasynda qaralady, — dedi Aqtóbe qalalyq máslıhatynyń depýtaty, Aqtóbe qalalyq máslıhatynyń ekonomıka, bıýdjet jáne qarjy boıynsha turaqty komıssııasynyń múshesi Jańalyq Ahash.
Onyń aıtýynsha, Qymbatqazy Ýrazalın Hromtaýda qyzmettik boryshyn ótep júrgende qaza tapty. Al Aıdos Boranbaev, Nurlan Alpysbaı, Rýslan Joldybaev 2011 jyly Shubarshıdaǵy terrorlyq akt kezinde, Rýstem Kenjalın Qyzyljar turǵyn alabynda dinı ekstremıstik sıpattaǵy qarýly topty ustaý kezinde kóz jumdy. 2012 jyly qaza tapqan Temirbek Jaqsylyqbaev, 2016 jyly mert bolǵan Berikjan Kalıev te tizimde bar. Sol jyly Aqtóbede áskerı boryshyn ótep, qarýly toptyń shabýyly kezinde kóz jumǵan Dosbol Saparǵa da kóshe ataýy berilýi múmkin. Raqymjan Janabergenov 1983 jyly Aqtóbe elevatoryndaǵy órtti sóndirý kezinde mert bolǵan.
Eske salsaq, 2016 jyly 5 maýsym kúni Aqtóbe qalasynda bir top lańkes «Pallada», «Pantera» qarý-jaraq dúkenderine shabýyl jasalyp, № 6655 áskerı bóliminiń qarý-jaraq qoımasyn basyp almaq boldy. Terrorlyq akt kezinde 7 adam qaza tapty. Arasynda áskerıler bar.