Aqtóbede erli-zaıypty azamattar koronavırýs ınfektsııasyn juqtyrdy
AQTÓBE. QazAqparat – Aqtóbede erli-zaıypty azamattardan koronavırýs ınfektsııasy anyqtalyp, 56 adam karantındik gospıtalge jatqyzyldy, dep habarlaıdy QazAqparat tilshisi.
«Bul eki jaǵdaı keshe tirkeldi. Barlyǵy oblys boıynsha 7 adam indetke shaldyqty. 1 sáýir kúni qala turǵyny emdeý mekemesine barǵan. Ol tynysy tarylyp, qyzýy kóterilgenin aıtqan. Sol kezde emdeý mekemesiniń arnaıy bólmesine oqshaýlanyp, jedel járdem shaqyryldy. Provızorlyq gospıtalge jatqyzylyp, qarym-qatynasta bolǵan adamdar anyqtaldy. Olar: otbasy, týystary, áriptesteri men kómek surap barǵan emdeý mekemesi. Barlyǵy 56 adam karantınge jatqyzyldy. Vırýsologııalyq tekserýden soń birden arnaıy palataǵa aýystyryldy. Sodan keıin áıelinen tabyldy. Ol da aýrýhanaǵa jetkizildi», - dedi oblystyq taýarlar men kórsetiletin qyzmetter sapasy men qaýipsizdigin baqylaý departamentiniń basshysy Nursulý Berkimbaeva.
Aıta keteıik, indetke shaldyqqan erli-zaıyptylar turǵan kópqabatty úıdiń bir podezi karantınge jabyldy. Olar 14 kún boıy úıde otyrady. Azyq-túlik pen dári-dármekke tapsyrys bere alady. Týystary da jetkizip beredi. Qazir polıtsııa baqylaýǵa aldy. Al taǵy 13 podezdiń turǵyndary tek jumysqa, azyq-túlik dúkenine bara alady. Sonymen birge emdeý mekemesi karantınde.
«Іndet juqtyrǵan er adamnyń Almaty, Nur – Sultan qalalaryna issaparmen barǵany anyqtaldy. Keıin tekserý kezinde áıelinen tabyldy. Ekeýiniń de jaǵdaıy turaqty. Qajetti em júrgizilip jatyr», - dedi oblystyq densaýlyq saqtaý basqarmasynyń basshysy Áset Qalıev.
