Aqtóbede erli-zaıyptyny óltirip, áıeldi kepilde ustaǵan sottalýshy jaýap berdi
AQTÓBE. KAZINFORM - Eki adamdy óltirdi, áıeldi kepilde ustady dep aıyptalyp jatqan Sársenbek Basanov sotta keshirim surap, taǵylǵan aıypty ishinara moıyndady. Ol bul qadamǵa jábirlenýshi kelinshektiń ótinishimen barǵanyn aıtty.
Aqtóbe oblystyq qylmystyq ister jónindegi mamandandyrylǵan aýdanaralyq sotynda sottalýshy Sársenbek Basanovqa qatysty isti qaraý jalǵasty. Sotttalýshy bıyl qańtar aıynda bolǵan oqıǵanyń mán-jaıyn aıtyp berdi.
- Sotqa qatysýshylardyń bárinen keshirim suraımyn. Qatty ókinemin. Bıyl 13 qańtarda Qaztýǵanova (jábirlenýshi, kepilde bolǵan kelinshek - red.) maǵan telefon shalyp, «ata-anammen arada problema bar, kómektesip, sóılesip bershi. Olar menen qutyla almaı júr» degen sııaqty áńgime aıtty. Men «qashan, qalaı baramyn, úıge kirgizbeıdi ǵoı» dedim. «Talaı kirip júrdiń ǵoı, solaı kirseńshi» dedi. Men úıge kire almaıtynymdy bilip kórshiniń sharbaǵynan sekirip, qolymdaǵy eki otvertkamen jazǵy úıdegi terezeni ashtym. Keıin sonyń ishinde otyrdym. Úıden shyǵady, sóılesemin dep oıladym. Arada birshama ýaqyt ótkende mashınanyń otalǵany estildi. Bir jaqqa ketip bara jatyr, bálkim balany sabaqqa apara jatyr dep oıladym. 20 mınýttan keıin ógeı ákesi jazǵy úıge kiredi, tońazytqyshty ashady, birdeńe alyp ishedi, qaıta ornyna qoıyp ketedi. 1 saǵattan keıin E.Qaztýǵanovanyń ózi kiredi. Suıyq sýsabyndy alyp shyǵyp ketedi. Úndegen joqpyn, - dedi sottalýshy S.Basanov.
Osydan keıin sottalýshy jábirlenýshimen sóıleskenin, bir sózinde oǵan eshteńe demeı jasyrynǵanyn aıtty. Túste aýla ishindegi saraıǵa marqum Zına Shaımaǵanbetova kirip, jasyrynyp otyrǵan Basanovty kóredi. Ol qolyna túsken zattardy laqtyryp, qorǵana bergende sottalýshy pyshaq suǵyp alady. Jansyz deneni sol kezde jertólege tastaǵan.
- Keıin E.Qaztýǵanova keldi. Ekeýimiz aıqaı-shýsyz sóılestik. Bolǵan jaǵdaıdy aıttym. «Ógeı ákem bar, ony ne isteımiz» dedi. Men «onyń qatysy joq, onymen sóılespeımiz, osy jerden qaıtyp, isti moıyndaımyz» dedim. Qandy birge súrttik, ol kómektesti, tazaladyq, bárin jınadyq. Sóıtip otyrǵanda syrttan ógeı ákesi kirip keledi. Kirip keledi de qoryqqan joq. Elmırany kórip, «Ne istep otyrsyńdar?» dep surady. Qasyna baryp, amandasamyn dep oıladym. Óltiremin degen oı bolmady. Soqqy berip, qulatyp, qashyp ketemin dep oıladym. Meniń qolymda qarý bolmady. Ol aǵash sapty pyshaqty ustap, sermeı bastady. Bir kezde Elmıra baltamen kelip urady. Ol meniń arqama tıdi. Meni emes, ógeı ákesin uryp jatyr eken ol. Álıev qulady,- dedi sottalýshy.
Sottalýshy S.Basanovtyń aıtýynsha, ári qaraı aıqaý-shý bolyp, ekeýi deneni jertólege tastaǵanyn, marqum Zına Shaımaǵanbetovany óltirgenin moıyndaıtynyn aıtty. Al Álıevti óltirmegenin, E.Qaztýǵanovany osy isin moıyndatý úshin kepilge alǵanyn málimdedi.
- Men seni kepil retinde alamyn. Óz istegenińdi moıyndaısyń dep aıttym. Ol «moıyndaımyn» dedi. Kepilge alǵan soń esikti aǵashpen, as úı ústelimen bekittim. Kirse ózimdi óltirip, Mırany (kepilde bolǵan kelinshek – red.) tiri qaldyramyn dep oıladym. Mıranyń maǵan «ońaltý ortalyǵyna jatqyzbasyn, jumysqa ornalasaıyn dep edim. Erkindik kerek, qaıda barǵym keledi, ne isteımin soǵan erkindik kerek, sóılesip bershi» dedi. Bary osy,- dedi sottalýshy.
Eske salsaq, bıyl 13 qańtar kúni Aqtóbede er adam áıeldi kepilge aldy. Oqıǵa ornynda bolǵan úsh adamnyń ekeýi kóz jumdy. Bireýi aýrýhanaǵa tústi. Birden qylmystyq is qozǵalyp, tergeý júrdi. Kepilde bolǵan áıel birneshe kún aýrýhanada em qabyldady. Eki apta buryn sot aldy tyńdaýy ótip, aıyptalýshyǵa Qylmystyq kodekstiń «Adam óltirý», «Bas bostandyǵynan zańsyz aıyrý», «Densaýlyqqa qasaqana aýyrlyǵy ortasha zııan keltirý» baptary boıynsha aıyp taǵyldy.