Aqtóbede erli-zaıyptyny kóligimen qaǵyp óltirgen polıtsııa qyzmetkeri sottaldy

AQTÓBE. KAZINFORM – Jol jıeginde velosıpedpen ketip bara jatqan erli-zaıyptyny kóligimen qaqqan polıtsııa qyzmetkeri sottaldy. Ol 9 jylǵa bas bostandyǵynan aıyryldy. 

Aqtóbe oblysynyń qylmystyq ister jónindegi mamandandyrylǵan aýdanaralyq sotynda polıtsııa qyzmetkeri Azamat Sımanovtyń isi qaraldy. Oǵan Qylmystyq kodekstiń 345-1-baby 4-bóligi jáne 347-baby boıynsha aıyp taǵyldy.

Іs materıalyna súıensek, Azamat Sımanov bıyl shilde aıynda mas kúıinde rýlge otyryp, Aqtóbe-Aqjar tas joly boıymen júredi. Bul jolda 60 km/saǵ jyldamdyǵy qarastyrylǵan bolsa, ol kólikti eki ese qatty aıdaǵan. Sol kezde velosıpedke mingesken erli-zaıyptyny qaǵyp ketedi. Eki adam da sol jerde kóz jumdy. Al rýlde bolǵan Aqtóbe qalalyq polıtsııa basqarmasy №4 Almaty aýdandyq bóliminiń jedel kezekshisi jábirlenýshilerge eshqandaı kómek kórsetpeı, eshkimge habarlamaı, oqıǵasy bolǵan jerden ketip qalǵan. Sot otyrysy kezinde sottalýshy kinásin ishinara moıyndady. Sot úkimimen Azamat Sımanov aıypty dep tanyldy. 

- Qylmystyq kodekstiń 345-1-baby 4-bóligi jáne 347-baby boıynsha aıypty dep tanylyp, túpkilikti 9 jylǵa bas bostandyǵynan aıyrý jazasy taǵaıyndalsyn. Kólik júrgizý quqyǵynan ómir boıyna aıyrylsyn. Jazasyn qylmystyq atqarý júıesiniń qaýipsizdigi tómen mekemesinde óteý belgilensin, - dedi sýdıa Altynbek Sabyrov.

Sonymen birge Qylmystyq kodekstiń 49-babynyń 1-bóligine sáıkes sottalýshy polıtsııa maıory sheninen aıyryldy.

Taraptar apellıatsııalyq shaǵym túsetinin aıtty. Ázirge sot úkimi zańdy kúshine engen joq.

Eske salsaq, jol kólik oqıǵasy kezinde 25 jáne 26 jastaǵy erli-zaıypty kóz jumdy. Artynda eki balasy qaldy.