Aqtóbede eriktilerdiń qatary kóbeıdi: 56 myńnan astam jas qoǵamdyq iske aralasty

BUU Bas Assambleıasynyń Qazaqstan Prezıdenti Qasym-Jomart Toqaev bastamasymen jarııalaǵan Halyqaralyq volonterler jyly aıasyndaǵy is-sharalar elimizde jalǵasyp keledi.

Osy rette Aqtóbe oblysynda 2026 jyldyń basynan beri 56 myńnan astam jastyń qatysýymen 1233 is-shara uıymdastyryldy.

Búginde óńirde 7 myńǵa jýyq volonter, 7 volonterlik uıym jáne 132 volonterlik top bar. Volonterler ekologııalyq aktsııalarǵa qatysyp, patrıottyq bastamalardy júzege asyrýǵa, tsıfrlyq saýattylyqty arttyrýǵa jáne áleýmettik qoldaýǵa muqtaj azamattarǵa kómek kórsetýge belsendi atsalysyp keledi.

— Óńirde áleýmettik mańyzy bar volonterlik jobalardy iske asyrýǵa erekshe kóńil bólinip otyr. Solardyń biri — «Juldyzdy jármeńke» qaıyrymdylyq jobasy. Joba volonterlerdi, kásipkerlerdi, shyǵarmashylyq zııaly qaýym ókilderi men qala turǵyndaryn ortaq maqsatqa jumyldyrýǵa baǵyttalady. Jármeńkeden túsken qarajat az qamtylǵan otbasylarǵa, erekshe qajettiligi bar balalarǵa jáne kómekke muqtaj azamattarǵa kómek retinde beriledi. Bul bastama qoǵamda qaıyrymdylyq mádenıetin qalyptastyryp, ózgege qoldaý kórsetýge úndeıdi, — delingen habarlamada.

Aıtýly jobalardyń qatarynda kolledjder men joǵary oqý oryndarynyń birinshi jáne ekinshi kýrs stýdentterine arnalǵan Volunteer School baǵdarlamasy bar. Úsh kúndik oqytý barysynda qatysýshylar volonterlik qyzmettiń negizgi qaǵıdalaryn meńgerip, kóshbasshylyq qabiletterin damytady, qoǵamdyq is-sharalardy uıymdastyrýdyń tájirıbelik daǵdylaryn ıgeredi. Oqý aıaqtalǵannan keıin olar óńirdegi volonterlik uıymdardyń jumysyna qosylady.

Jańa bastamalardyń biri — tsıfrlyq volonterlikti damytýǵa baǵyttalǵan Digital Volunteer Aqtobe jobasy. Joba aıasynda kıberqaýipsizdik, tsıfrlyq saýattylyq jáne medıakommýnıkatsııa baǵyttary boıynsha daıyndyqtan ótken 30 volonterden quralǵan mobıldi top jasaqtaldy.

Osydan buryn Balqashta Halyqaralyq volonterler forýmy ótkenin jazǵanbyz.