Aqtóbede erekshe balanyń sýret kórmesi ótip jatyr
AQTÓBE. KAZINFORM – Týa bitti sal aýrýyna shaldyqqan Iskander Saǵynaıdyń týyndylary Óner mýzeıindegi kórmege qoıyldy. Munda bozbalanyń 30-ǵa jýyq jumysy bar.
Óner mýzeıindegi «Únsiz daýys» kórmesi – 17 jastaǵy Iskander Saǵynaıdyń alǵashqy qadamy. Munda ol qazaqtyń keń dalasy men qala ómirin sheber beınelegen týyndylaryn iriktep ákeldi.
Álemmen únsiz tildesken ol 12 jasynda 3 aı sýret mektebinen dáris alsa, keıin úıinde otyryp sheberligin shyńdady. Sebebi Iskander Saǵynaıdyń estý qabileti nashar. Ata-anasy der kezinde baǵyttap, tipti úı ishinen arnaıy bólmesin jasaqtap bergen.
– Balam osydan 5-6 jyl buryn sýret sala bastady. Biz ákesi ekeýmiz qoldap, qamqorlyq tanytyp otyramyz. Sóıtip jeke shyǵarmashylyq kórmesi ótti. Bul kúnge uzaq daıyndaldyq. Ár sýrettiń artynda úlken eńbek, kirshiksiz sezim, sheksiz qııaldaý jatyr. Árbir týyndy onyń ishki syryn bildiredi. Balam bolashaqta kim bolaryn ózi sheshedi. Biraq qazir ol tiginshi mamandyǵyn oqyp júr. Aldaǵy ýaqytta jaqsy dızaıner bolýy múmkin, - dedi anasy Janna Áljanova.
Iskander Saǵynaıdyń ákesi Nurbek Saǵynaıdyń aıtýynsha, alǵashynda bala sýret salýǵa ózi qyzyqqan. Keıin onyń yntasyn anasy kórip, arnaıy dáris alý kerek dep sheshti.
– Qazir áýesqoı sýretshiden kásibı sýretshige aınalyp keledi. Kenepke kásibı mamandar qoldanatyn boıaýmen sýret salady. Ne salaryn ózi tańdaıdy. Sýretine qarasań ishki álemi tereń. Sonymen birge ol shahmat oınaıdy. Aqtóbe qalasynda úshinshi razrıad aldy. Júze biledi, tipti óz betimen aǵylshyn tilin meńgerip alǵan. Ony qalaı úırengenin bilmeımiz. Bizdiń oıymyzsha fılm qarap meńgergen sııaqty. Ol aǵylshynsha túsinedi, jazady, - dedi Nurbek Saǵynaı.
Eske salsaq, S.Aıtbaev atyndaǵy Qyzylorda kórkemsýret galereıasynyń qoryndaǵy kartınalardyń birine jasandy ıntellekt jan bitirdi.