Aqtóbede erekshe balalardyń qaýipsizdigi úshin 1 400 GPS-treker satyp alyndy

AQTÓBE. KAZINFORM — Treker aýtızm dıagnozy bar balalarǵa arnalǵan.  Satyp alýǵa bıýdjetten 30 mln teńgege jýyq qarjy bólindi.

Aqtóbe oblystyq bilim basqarmasy men oblystyq psıhologııalyq-medıtsınalyq-pedagogıkalyq keńes mekemesi aýtızm dıagnozy bar barlyq balaǵa treker satyp aldy. Bul qurylǵyny balanyń moınyna taǵýǵa nemese kıimine qadap berýge bolady. Ata-anasy aldyn ala bala júrýi tıis aımaqty belgilep, baǵdarlamaǵa engizedi. Bala sol aımaqtyn shyǵyp ketse dabyl júıesi iske qosylady. Bala da túımeni basyp, ata-anasyna habar beredi.

— Qurylǵy balanyń qaı jerde júrgenin baqylaýǵa, tótenshe jaǵdaı kezinde jedel áreket etýge múmkindik beredi. GPS-trekerlerde SOS batyrmasy bar. Geoaımaqty kórýge bolady, qaıda bolǵanyn arhıvten qaraıdy. Sonymen qatar qurylǵy jeńil, balaǵa yńǵaıly jáne batareıasy uzaq ýaqytqa jetedi. Olar balanyń balabaqshaǵa, mektepke barar jolyn qarap, serýendegende jáne saparda baqylaýǵa múmkindik beredi, - dep habarlady Aqtóbe oblysy ákiminiń baspasóz qyzmeti.

Byltyr Aqtóbede erekshe bala úıinen shyǵyp ketip, ony 500-ge jýyq adam izdedi. TJM-niń tikushaǵy áýeden baqylaý jasap, Kárim Jetirýdiń denesi tórt kúnnen soń tabyldy.