Aqtóbede «Er Edige» qoıylymynyń premerasy boldy

Etno-folklorlyq tarıhı drama Edige batyrdyń erligi men qazaq tarıhynyń jarqyn kezeńderi jaıynda baıandaıdy. Aıta keteıik, bul Edige batyrdyń atyn shyǵarǵan alǵashqy spektakl. Onyń qoıylymy Altyn ordanyń 750 jyldyǵyna arnalǵan.

«Oqıǵa Toqtamystyń han ordasynda órbıdi. Toqtamys hannyń áıeli Toǵaıbek hanym
dalanyń eki arysyToqtamys han men Edige batyrdyń arasyna jik salyp, olar dushpanǵa aınalady. Spektaklde sondaı-aq, Altyn Ordanyń sońǵy, myzǵymas ámirshisi Ámir Temir men Edige batyrdyń qarym-qatynasy da aıtylady»,- deıdi rejısser Danııar Bazarqulov.
Qoıylymdaǵy tarıhı oqıǵalar Edigeniń erligin jyrlaǵan zamandas aqyndardyń jyrymen astasyp jatyr . Kópten kútken tusaýkeserde oblys ákimi Ońdasyn Orazalın, sonymen qatar, spektakl avtory Svetqalı Nurjan, qurmetti qonaqtar, sonyń ishinde elimizdiń ózge óńirlerinen kelgender boldy.

Oblys ákimi Ońdasyn Orazalın tusaýkeserden keıin: «Búgin biz aıtýly oqıǵanyń kýási boldyq. Qoıylymnyń oqıǵa jelisi bizdiń tarıhı jadymyzdy oıatady. Edigeniń tarıhtaǵy orny men mańyzy áli kúnge deıin tolyq zerttelmegen. Sońǵy jyldary Aqtóbe oblysynda uly batyrdyń esimin jańǵyrtý jáne saqtaý baǵytynda aýqymdy jumystar atqaryldy, ıaǵnı halyqaralyq ǵylymı-tájirıbelik konferentsııalar ótkizilip, eskertkish ornatyldy, «Er Edige - Noǵaıly dáýiriniń jyry« atty albom jınaǵy tanystyryldy. Óńirde halyqtyń baı mádenı murasyn júıelendirý jáne ózektilendirý boıynsha aýqymdy jumystar jalǵasatyn bolady»,- dep atap ótti.