Aqtóbede er adamdy júksalǵyshqa kúshtep tıegen toptyń soty bastaldy

AQTÓBE. KAZINFORM - Sotqa bes sottalýshy jetkizildi. Olarǵa buzaqylyq jasady jáne adam urlady degen aıyp taǵyldy.

Avtonesıe syltaýymen alty adamdy aldaǵan alaıaqqa sot úkimi shyqty
Foto: Kazinform\JI

Aqtóbe qalalyq №2 sotynda Qylmystyq kodekstiń «Buzaqylyq» jáne «Adam urlaý» baptary boıynsha is qaraldy. Sotta 5 sottalýshyǵa aıyp taǵyldy.

- 2026 jyly 20-shilde kúni saǵat shamamen 23:00-de sottalýshynyń biri óziniń kóligimen kele jatady. Sol sátte ol júrginshiler jolymen asyqpaı ótip bara jatqan jábirlenýshini kórip, tez júrýin suraǵan. Ekeýiniń arasynda túsinispeýshilik týyndaǵanymen, jábirlenýshi oqıǵa bolǵan jerden ketip qalǵan. Alaıda sottalýshynyń biri janjaldy beıbit jolmen sheshkisi kelmeı, mán-jaıdy dostaryna aıtady. Erteńine sottalýshylardyń biriniń kóligine minip, jábirlenýshiniń úıinen shyqqanyn kútedi. Jábirlenýshi shyǵyp, esik aldyndaǵy kólikke mingende sottalýshylar óz kóligimen kóldeneń kelip, toqtatady. Biri jábirlenýshini kólik ishinen kúsh qoldanyp shyǵaryp alyp, muryn tusynan urady. Jábirlenýshi qulaǵan. Sottalýshylar kúsh qoldanyp, júksalǵyshqa salyp alyp ketedi. Keıin kópir astyna aparady,- dedi sotta prokýror.

Sottalýshylar Qylmystyq kodekstiń 293-baby 2-bóligi 1-tarmaǵymen jáne 125-baby 2-bóligi 1-tarmaǵymen jaýap berip jatyr. Al jábirlenýshi keshirim bergenin, medıatsııalyq kelisim jasaǵanyn aıtty.

- Dúkenge baryp, úıge kele jatqanda joldan óttim. Sol kezde «maımańdamaı tez júr» dep aıtty. Men boqtap jiberdim. Sottalýshynyń birin burynnan tanımyn, biraq aralaspaımyn. Bir kún ótken soń úıden shyqqanda kólikti toqtatyp, bir urdy. Esimnen tanyp qaldym. Kózimdi ashqanda kópirdiń astynda ekenimizdi kórdim. Bireýi «aýrýhanaǵa barasyń ba» dep surady. Men «úıge aparyp tasta» dep aıttym. Úıge aparyp tastady,- dedi jábirlenýshi.

Eske salsaq, jaz aıynda Aqtóbede adam urlaǵandardyń áreketi ózge kóliktiń beınebaqylaý kamerasyna túsip qaldy. Kúdiktiler jedel izdestirý kezinde ustaldy.