Aqtóbede er adam jedel járdem feldsherin uryp tastady
AQTÓBE. QazAqparat - Aqtóbede er adam keshigip kelgen jedel járdem feldsherin uryp tastady. Taıaq jegen feldsher aýrýhanaǵa jetkizildi, dep habarlaıdy QazAqparat tilshisi.
15 aqpan kúni saǵat 03:36-da 32 jastaǵy áıel jedel járdemge qońyraý shalyp, keýde tusy aýyryp turǵanyn habarlaǵan. Jedel járdem qyzmeti shaǵyrtý túsken mekenjaıǵa 03:47-de bardy.
«Jedel járdem brıgadasy barǵan kezde olardy 27 jastaǵy er adam kútip alǵan. Onyń ishimdik ishkeni belgili boldy. Al naýqas áıel keýde tusy aýyryp jatqanyn aıtqan. Naýqasty tekserý kezinde er adam uzaq kútip, telefonǵa durys jaýap bolmaǵanyn eskertedi. Al naýqastyń jeke kýáligin suraǵan kezde er adam feldsherdi basymen urǵan. Oqıǵa ornyna polıtsııa shaqyrylǵanda ǵana 32 jastaǵy áıeldi qarap, kómek berýge múmkindik boldy. Barlyq jaǵdaı beınekameraǵa túsirildi. Al oqıǵadan soń jedel járdem brıgadasy polıtsııaǵa aryz túsirip, ózderi de aýrýhanada em qabyldady», - dep habarlady oblystyq densaýlyq saqtaý basqarmasynyń baspasóz qyzmeti.
Aıta keteıik, jedel járdem brıgadasy jetkenshe er adam qońyraý shalyp, dıspetcherlerdi balaǵattaǵan. Al jedel járdem qyzmeti osyndaı jaǵdaılar maman tapshylyǵyn týdyratynyn aıtyp otyr.
