Aqtóbede epılepsııaǵa shaldyqqan balalardy emdeý joly qaıta qaralady
AQTÓBE. KAZINFORM – Aqtóbe oblystyq densaýlyq saqtaý basqarmasy epılepsııaǵa shaldyqqan balalardy aýrýhanaǵa jatqyzyp, em taǵaıyndaý jolyn ózgertedi. Sebebi buǵan deıin olar qabyldap kelgen ospolat preparatyn satyp alý qıyndaǵan.
Aqtóbede epılepsııaǵa shaldyqqan jasóspirim qyzdyń jaǵdaıy kúrt nasharlap, aýrýhanaǵa tústi. Sebebi sońǵy jyldary qabyldap júrgen ospolat preparaty tabylmaı qalǵan. Osy oqıǵadan soń oblystyq densaýlyq saqtaý basqarmasy emdeý jolyn ózgertýge sheshim qabyldaǵan.
- Epılepsııaǵa qarsy ospolat preparatyn qabyldaıtyn balalardy dári-dármekpen qamtamasyz etý máselesi bizdiń qatań baqylaýymyzda. 2026 jyly quramynda sýltıam áser etýshi zaty bar atalǵan preparatty satyp alýda qıyndyqtar týyndady. Onyń negizgi sebebi – naryqta áleýetti ónim berýshilerdiń bolmaýy. Qazirgi ýaqytta biz bul máseleni sheshýdiń barlyq múmkin jolyn qarastyryp, tıisti jumys júrgizip jatyrmyz. Biz úshin eń bastysy – balalardyń densaýlyǵy jáne emdi úzdiksiz júrgizý. Árbir balanyń jaǵdaıy jeke qaralyp, qajetti emmen qamtamasyz etý úshin barlyq shara qabyldanady,- dedi Aqtóbe oblystyq densaýlyq saqtaý basqarmasy basshysynyń orynbasary Aıgúl Amanjolova.
Aqtóbede epılepsııaǵa shaldyqqan 7 bala ospolat preparatyn qabyldaǵan. Endi olardyń bári oblystyq balalar aýrýhanasyna jatqyzylady.
- Naýqastardyń árqaısysyn beıindi mamandar qarap, balama em taǵaıyndalady. Balalardy dári-dármekpen qamtamasyz etý máselesi QR Densaýlyq mınıstrligi basqarmasy men Aqtóbe oblystyq densaýlyq saqtaý basqarmasynyń erekshe baqylaýynda. Basty mindetimiz – ár balaǵa qajetti emdi qamtamasyz etip, olardyń eminiń úzilýine jol bermeý,- oblystyń shtattan tys bas nevrologi Aqjibek Esqalı.
Eske salsaq, epıleptsııaǵa shaldyqqan aqtóbelik qyzdyń jaǵdaıy kúrt nasharlap, turaqty qabyldap júrgen ospolat preparaty tabylmaı qaldy. Dárigerler bul dáriniń memlekettik tirkeýde joq ekenin aıtty.
