Aqtóbede epılepsııaǵa shaldyqqan balalar qabyldaıtyn dári tabylmaı jatyr
AQTÓBE. KAZINFORM — Ospolot preparatyn tappaǵan ata-analar kómek surap, shaǵym túsirdi. Al oblystyq densaýlyq saqtaý basqarmasy bul dáriniń memlekettik tirkeýde joq ekenin aıtty.
Aqtóbe qalasynyń turǵyny qyzynyń aýrýy dendegenin, ony basý úshin arnaıy preparattyń qajet ekenin aıtyp shaǵym túsirdi.
— Qyzym epılepsııa aýrýyna shaldyqqan. Úkimetten tegin beriletin ospolot dárisin ala almaı otyrmyz. Bizge tek osy dári ǵana kómektesedi. Qazir jaǵdaıymyz aýyr. Biz sııaqty kóptegen ata-ana sharasyz kúıde otyr. Satyp alaıyn dese de dárihanada joq, — dedi qala turǵyny Baǵdat Baımýrzın.
Aqtóbe oblystyq densaýlyq saqtaý basqarmasynyń habarlaýynsha, ospalot preparaty memlekettik tirkeýde joq. Sol sebepti dárini satyp alý múmkin emec.
— Aqtóbe oblysynda tirkeýde turǵan 7 naýqas bala qordaǵy qalǵan dárilik preparattarmen qamtamasyz etiledi. Búgingi kúni shtattan tys bas balalar nevrologi patsıentterdiń emdeý syzbasyn jáne epılepsııaǵa qarsy basqa preparatqa aýystyrý jumystary júrgizilýde. Qazirgi ýaqytta 2 balaǵa qatysty emdeý tásili ózgertildi, — dedi basqarmanyń baspasóz qyzmeti.
Eske salsaq, Pavlodar oblysynda jyl basynan beri dárilik zattar men medıtsınalyq buıymdardyń aınalysy salasynda 8 ákimshilik quqyq buzýshylyq týraly hattama toltyrylǵan.
