Aqtóbede epıdemııalyq parotıt ınfektsııasy tirkelip jatyr
AQTÓBE. KAZINFORM – Sońǵy ret bul ınfektsııa bes jyl buryn tirkelgen. Sáýir aıynda 5 adamnan anyqtalyp, em qabyldady.
Aqtóbe oblystyq sanıtarııalyq-epıdemıologııalyq baqylaý departamentiniń basshysy Raıhan Qoıshanovanyń aıtýynsha, óńirde vaktsına almaǵan balalar arasynda juqpaly ınfektsııa tirkelip jatyr. Onyń ishinde qyzylsha, kókjótel jáne epıdemııalyq parotıt ınfektsııasy bar.
- Jyl basynan beri Aqtóbe oblysynda 242 adamnan qyzylsha anyqtaldy. Onyń ishinde 14 jasqa tolmaǵan 213 bala bar. ıAǵnı byltyrǵyǵa qaraǵanda 7,5 esege kóbeıip otyr. Kóbi Aqtóbe qalasynda anyqtaldy. Qyzylsha juqtyrǵandardyń 90% vaktsına qabyldamaǵan. Keıbirinde ekpe jasyna jetpegen, sonymen birge bas tartqan. Taldaýǵa súıensek, ınfektsııa juqtyrǵandardyń 75%-dan astamy 5 jasqa tolmaǵan bala. Arasynda balabaqsha baratyny da bar. Nátıjesinde 27 mektepke deıingi uıym, 21 mektep pen 4 medıtsınalyq mekemede indetke qarsy is-sharalar uıymdastyryldy, - dedi Aqtóbe oblystyq sanıtarııalyq-epıdemıologııalyq baqylaý departamentiniń basshysy Raıhan Qoıshanova.
Sonymen birge Aqtóbe oblysynda 9 adamǵa kókjótel dıagnozy qoıyldy. 2025 jyldyń birinshi toqsanyna qaraǵanda juqtyrý deregi 2 ese ósken.
- Óńirde sáýir aıynan bastap 5 naýqasqa epıdparotıt dıagnozy qoıyldy. Onyń ishinde 4-i ekpe statýsy belgisiz eresek bolsa, bireýi ata-anasy ekpeden bas tartqan bala. Epıdemııalyq parotıt - vırýstyq juqpaly aýrý. Asqynsa menıngıt, orhıt, pankreatıt bolýy múmkin. Tipti bedeýlikke ákep soqtyrýy yqtımal, - dedi Raıhan Qoıshanova.
Buǵan deıin habarlaǵanymyzdaı, epıdemıologter aldaǵy demalys jáne mereke kúnderi balalardy jabyq oıyn-saýyq oryndaryna aparmaýǵa keńes beredi.
