Aqtóbede elimizdiń tuńǵysh Ádilet mınıstrine eskertkish ornatyldy
AQTÓBE. QazAqparat - Aqtóbede birinshi Ádilet mınıstri Naǵashybaı Sháıkenovke eskertkish qoıyldy. Eskertkishtiń ashylýyna memleket qaıratkeriniń týma-týystary qatysty, dep habarlaıdy QazAqparat tilshisi.
Naǵashybaı Sháıkenov táýelsizdik alǵan jyldar el zańnamalarynyń qabyldanýyna úles qosqan qaıratker. Ol ár jyldary Memleket basshysy Nursultan Nazarbaevtyń keńesshisi, Ádilet mınıstri, Premer-mınıstrdiń orynbasary qyzmetterin atqaryp, Qazaqstandaǵy quqyqtyq reformanyń avtory atandy. Aqtóbedegi Mánshúk Mámetova men Naǵashybaı Sháıkenov kósheleriniń qıylysynda búgin mádenı shara ótti. Qoǵam qaıratkerine eskertkish ornatyldy.
Sharaǵa Aqtóbe oblysynyń ákimi Berdibek Saparbaev, QR bas prokýrorynyń orynbasary Andreı Lýkın, Ádilet vıtse-mınıstri Záýresh Baımoldına, Naǵashybaı Sháıkenovtyń jubaıy Lıdııa Shaıkenova qatysty.
«Memleket basshysy táýelsizdikti alý qıyn, biraq ony saqtap qalý odan da qıyn ekenin únemi aıtady. Naǵashybaı Sháıkenov sekildi saıası qaıratkerlerdiń arqasynda biz egemendigimizdi saqtap qana qoımaı, nyǵaıta da aldyq. Onyń ómiri men qyzmeti óskeleń urpaqqa jarqyn úlgi bolýy tıis. Biz Naǵashybaı Sháıkenov kóshesindegi eskertkishti asha otyryp, onyń eńbegine qurmet kórsetemiz»,- dedi oblys ákimi Berdibek Saparbaev.
Al Ádilet vıtse-mınıstri Záýresh Baımoldına qoǵam qaıratkeriniń zań reformalaryn damytý, zań mamandaryn daıyndaýdaǵy úlesi týraly aıtyp berdi.
«Naǵashybaı Amanǵalıuly elimiz táýelsizdik alǵan kezde quqyq salasyna zor eńbek sińirdi. Búgingi jetistigimizde qoǵam qaıratkeriniń úlesi bar. Ol bilikti kadr daıyndap, quqyq salasynyń damýyn jetildirdi», - dedi Ádilet vıtse-mınıstri Záýresh Baımoldına.
