Aqtóbede elektrondy qyzmet kórsetýge kedergi keltiretin eki negizgi faktor anyqtaldy
Aqtóbege QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń apparat jetekshisi Saıan Ahmetjanov keldi. Memlekettik qyzmetkerlermen kezdesip, bos jumys oryndary jármeńkesine qatysqan soń mamandandyrylǵan halyqqa qyzmet kórsetý ortalyǵynyń jumysymen tanysty. Qazirgi kezde elimizde 746 memleketik qyzmet bar bolsa, Aqtóbede 400-ge jýyq qyzmet kórsetiledi. Onyń teń jartysyn úıden shyqpaı, keńsede otyryp alýǵa múmkindik bar. Ýaqytty joǵaltpaı, memlekettik mekemelerdiń tabaldyryǵyn tozdyrmaı, ınternet arqyly bárin tyndyrýǵa bolady. Biraq tsıfrlandyrýdy iske asyrýǵa eki faktor keri áserin tıgizip tur.
«Qazirgi kezde aýyldaǵy ınternet jyldamdyǵy óte tómen. Sondyqtan elektrondy qyzmetke júginetinderdiń qatary az. Ekinshiden, adamdar kompıýter tilin bilmeıdi, olar elektrondy qoltańba alyp, bárin úıde otyryp tyndyrýǵa bolatynyn túsinbeıdi. Jasy úlken adamdar áli de memlekettik mekemege baryp, anyqtama alyp, suraǵan organǵa tapsyrǵandy jón kóredi. Olarǵa portal resmı saıt, jeke kabınetke kirip, qyzmet túrin tegin paıdalanýǵa bolatynyn aıtyp túsindirý qıyn. Biz saraptama jasap, aýdan ákimderinen «nege elektrondy túrde qyzmet kórsetpeısizder» dep suradyq. Olar ınternet jyldamdyǵy jumys isteýge múmkindik bermeı otyrǵanyn alǵa tartyp otyr»,- dedi Ilıa Pak.
Aıta keteıik, qazirgi kezde Aqtóbede dárigerlerge arnaıy qosymshany júktep, elektrondy túrde jazylýǵa bolady. Biraq bul qyzmetti paıdalanyp otyrǵandar da az. Sondyqtan mekemelerde memlekettik qyzmetti elektrondy túrde alýǵa bolatynyn túsindiretin arnaıy buryshtar ashyldy. Buǵan deıin habarlaǵanymyzdaı, Aqtóbedegi emhanada mobıldik qosymshany túsindirý, jarnamalaý jumystaryna medıtsınalyq kolledj, ýnıversıtet stýdentteri jumyldyrylǵan bolatyn.
Dál osyndaı buryshtar qyzmet kórsetý ortalyqtarynda bar.
