Aqtóbede elektr symyna muzdaq qatyp, birneshe aýyl jaryqsyz qaldy
AQTÓBE. KAZINFORM — Bul jumys keshe bastalyp, búgin jalǵasty. Jumysshylar symdy qaǵyp, muzdaqty túsirip jatyr.
Jumys Alǵa aýdanyndaǵy birneshe aýylda qatar júrgizildi. «Energosıstema» JShS-niń qyzmetkerleri qazirgi kezde tazartý jumystaryn jalǵastyryp jatyr.
— Qaraqudyq jáne Toqmansaı eldi mekenderinde elektr energııasyn berý ýaqytsha, májbúrli túrde ishinara toqtatyldy. Jaryqty óshirý kezinde tutynýshylarǵa aldyn ala habarlama berildi. Sonymen qatar Petrovka eldi mekeninde de elektr energııasyn berý ýaqytsha shekteldi. 10 tutynýshyǵa generator berildi. Jelide qaıta iske qosý jumystary júrgizilip jatyr. Mamandar men arnaıy tehnıka jumyldyryldy, — dep habarlady «Energosıstema» JShS baspasóz qyzmeti.
Mamandar sebebin kún jylyp, keıin aıaz kúrt kúsheıgennen dep túsindirdi. Alǵa aýdany ákimdiginiń habarlaýynsha, keı jerde muzdaqtyń dıametri 15 sm jetken. Muzdaq túsirý jumystary Mártók, Hromtaý, Qarǵaly aýdandarynda da júrgizildi.
Eske salsaq, jyl basynda Aqtóbede elektr symynyń boıyna qatqan muzdaqtyń dıametri 20 sm boldy. Ol kezde Muǵaljar aýdanynyń eki aýylynda ondaǵan baǵana qulady.