Aqtóbede elektr qýaty men gaz baǵasy ózgerdi
AQTÓBE. KAZINFORM – Aqtóbelik turǵyndar sáýirden bastap elektr qýaty úshin 1 kVt/saǵ 19,94 teńge tóleıdi. Tarıf 3,26 teńgege ósip tur.
Aqtóbelikterdi elektr qýatymen qamtyp otyrǵan «Energosıstema» JShS-i 2025 jylǵy 1 sáýirinen bastap shekti baǵany kóterý týraly habarlama berdi. Ol Tabıǵı monopolııalardy retteý komıtetiniń Aqtóbe oblysy boıynsha departamentine tústi. «Energosıstema» JShS-i tarıfti kóterý kezinde birneshe sebebin atady.
Sebepteri: elektr energııasyn berý tarıfiniń kóterilýi, «Jańartylǵan energııa kózderin qoldaý jónindegi Qarjy-esep aıyrysý ortalyǵy» JShS-i elektr qýaty daıyndyǵyn qoldaý qyzmetteri tarıfiniń ósýi, jabdyqtaý ústemesiniń ulǵaıýy.
– Tabıǵı monopolııalardy retteý komıtetiniń Aqtóbe oblysy boıynsha departamenti jobany taldap, myna tarıfti bekitti. Olar:
— Turǵyndar úshin 1 kVt/saǵ 19,94 teńge;
— zańdy tulǵalar úshin 1 kVt/saǵ 49,99 teńge;
— memlekettik bıýdjetten qarjylandyrylatyn zańdy tulǵalar (bıýdjettik uıymdar) 67,07 teńge/kVtsaǵ;
— áleýmettik mańyzy bar azyq-túlik taýarlaryn óndirýshiler úshin jáne arnaıy ekonomıkalyq jáne ındýstrııalyq aımaqtardyń aýmaǵynda ornalasqan tutynýshylar úshin 38,86 teńge/kVtsaǵ.
— Habarlamany qaraý sheńberinde keıbir shyǵyn azaıtyldy. Olar:
— elektr energııasyn berý tarıfteri 25,46 teńge/kVtsaǵ-tan 19,07 teńge/kVtsaǵ-qa deıin, tómendeý 6,38 teńgeni nemese 25% teńgeni qurady.
— jabdyqtaý ústemesi 1,60 teńge/kVtsaǵ-tan 43 tıynǵa nemese 27% teńgege deıin tómendetildi, - dedi Qazaqstan Respýblıkasy Ulttyq ekonomıka mınıstrligi tabıǵı monopolııalardy retteý komıtetiniń Aqtóbe oblysy boıynsha departamentiniń basshysy Erlan Dúısen.
Sonymen birge «QazaqGaz Aimaq» AQ AÓF-y da tarıfti kóterý týraly habarlama berdi. Kompanııa gaz baǵasyn 7-14% kóterýdi usyndy. Tabıǵı monopolııalardy retteý komıtetiniń Aqtóbe oblysy boıynsha departamenti turǵyndar úshin 1 000 tekshe metrine 13 173,55 teńgeden 14 462,92 teńgege ósirýge kelisim berdi. Sonymen birge turǵyndarǵa, túrli kompanııalarǵa jylý taratatyn kompanııalarǵa, bıýdjettik mekemelerge, iri kommertsııalyq tutynýshylarǵa, tsıfrlyq maınıngti júzege asyratyndar nemese tsıfrlyq maınıngti júzege asyrý úshin elektr energııasyn óndiretinderge tarıf kóterildi.
Eske salsaq, Aqtóbede 1-qańtardan bastap sýmen jáne jylýmen jabdyqtaý tarıfi ózgeredi. Turǵyndar úshin sýmen qamtý tarıfi 24,70 teńgege, al jylymen qamtý 37 teńgege kóteriledi.