Aqtóbede Elek jáne Sazdy ózenderi tasyp jatyr
AQTÓBE. QazAqparat - Aqtóbe qalasyndaǵy Sazdy jáne Aqtóbe sý qoımasy qar sýyna toldy. Qazir sý Elek jáne Sazdy ózenderine jiberilip, ózen mańyndaǵy saıajaılardy sý basty, dep habarlaıdy QazAqparat tilshisi.
Aqtóbe qalasynda tótenshe jaǵdaı jarııalanyp, arnaıy qyzmet turǵyndarǵa habarlandyrý berdi. Sebebi, Elek jáne Sazdy ózeniniń arnasy tolyp, sý jaǵaǵa shyqty. Qazirgi ýaqytta ózen mańyndaǵy baý-baqsha ujymdaryna qonystanǵan adamdar qaýipsiz jerge kóshirilip jatyr.
«Qaladaǵy turǵyn úılerdi sý baspaıdy degen boljam bar. Biraq saıajaıǵa qonystanǵan adamdardyń qaýipsiz jerge kóshýine týra keledi. Sebebi, Aqtóbe jáne Sazdy sý qoımasy tolyp, sý Elek, Sazdy ózenderine jiberilip jatyr. Al Qarǵaly sý qoımasy 66 paıyzǵa toly. Sonymen qatar, Jińishke, Tamdy, Jaman Qarǵaly, Bulaq ózenderi arnasynan asty»,- dedi oblystyq tótenshe jaǵdaılar departamentiniń basshysy Baýyrjan Syzdyqov.
Qutqarýshylar 45 baý-baqsha ujymyndaǵy myńdaǵan úıdi sý basqanyn anyqtady. Qazir turǵyndar qaýipsiz jerge kóshirilip jatyr. Al kóshýden bas tartqan adamdar arnaıy qolhat jazyp, baspanalarynda qalýdy jón kórgen.
«Elek ózeni mańyndaǵy baý-baqshadan sý sorylmaıdy. Sebebi, ózen jaǵasyndaǵy sýdy sorý esh nátıje bermeıdi. Inertti materıaldar da tasylmaıdy. Bul da nátıje bermeıdi.
Keshe 600 úıge habarlandyrý berip, ózen tasýy múmkin dep aıttyq. Qutqarýshylar qaýip bar ekenin eskertti. Biraq 522 adam qaýipsiz jerge kóshýden bas tartyp otyr. Barlyǵy 227 adam qaýipsiz jerlerge kóshirildi, 6 adam ýaqytsha ornalastyrý beketterinde, olardyń ishinde eki bala bar. 129 adam týystarynyń úılerine ornalasty», - dedi B. Syzdyqov.
Tótenshe jaǵdaılar qyzmeti keshe eriktilerdiń kómegimen kvadrokopter arqyly qala mańyn sholyp shyqty. Al búgin Aqtóbe qalasynda jańbyr jaýyp tur. Tótenshe jaǵdaılar qyzmeti ózen sýynyń arnasy áli de kóterilýi múmkin dep boljap otyr.
