Aqtóbede Elek ózeni aýmaǵynda qum óndirip jatqan kompanııa kelisimshart talaptaryn buzdy

AQTÓBE. KAZINFORM – Ózen jaǵasyndaǵy jer 2010 jyly jalǵa berilgen. Bıyl kompanııa qum-qıyrshyqtas qospasyn óndirý talaptaryn saqtamaı, turǵyndar tarapynan narazylyqqa ilikti.

Aqtóbe qalasyndaǵy Elek ózeninen qum óndirip jatqan kompanııanyń jumysy kúmán týdyrdy. Ásirese jasyl jelekti qorǵaý talaptary saqtalmaı jergilikti turǵyn dabyl qaqty.

- Jaǵdaıdy jan-jaqty zerdeleý maqsatynda oblys ákimdigi jumys tobyn quryp, aýmaqqa baryp tekserý júrgizdi. Áleýmettik jelilerde kórsetilgen jer qoınaýy ýchaskesi 2010 jyldyń 9 shildesinde «Tiles» JShS-ne qum-qıyrshyq tas qospasyn óndirýge berilgeni anyqtaldy. Sol jyly qarasha aıynda Aqtóbe oblysynyń tabıǵı resýrstar jáne tabıǵat paıdalanýdy retteý basqarmasy men «Tiles» JShS-i arasynda qum-qıyrshyq tas qospasyn óndirý sharty jasalǵan. Tekserý barysynda kásiporyn qum-qıyrshyq tas qospasyn Elek ózeniniń sý qorǵaý aımaǵynda (arnadan 30 m qashyqtyqta) óndirip jatqan. Bul buryn kelisilgen jer bólý jobasynyń sharttaryna qaıshy ekeni anyqtaldy. Jaıyq-Kaspıı basseındik ınspektsııasy óz quzyreti sheńberinde tıisti sharalar qabyldaıtyn bolady,- dep habarlady oblys ákiminiń baspasóz qyzmeti.

Eske salsaq, Aqtóbe oblysy aýmaǵynda 236 jer qoınaýyn paıdalanýshy bar. Onyń ishinde 52 jer qoınaýyn paıdalanýshy 71 kelisimshart negizinde kómirsýtek shıkizatyn óndiredi. Al 79 jer qoınaýyn paıdalanýshy qatty paıdaly qazbalardy ıgeredi. Olarda 15 kelisimshart, 206 lıtsenzııa bar.