Aqtóbede eldimekenderdiń bes paıyzynda ǵana zańdastyrylǵan qoqys polıgony bar
AQTÓBE. KAZINFORM – Oblysta 319 eldimeken bolsa, onyń 15-indegi ǵana polıgon zańdastyrylǵan. Ózgesinde áli de qujat joq.
Aqtóbe oblysy úshin turmystyq qatty qaldyqty suryptaý, óńdeý ǵana emes, ony ornalastyrý da ózekti máseleniń biri bolyp tur. Tabıǵı resýrstar jáne tabıǵat paıdalanýdy retteý basqarmasynyń basshysy Isataı Espaǵanbetovtiń aıtýynsha, oblysta 319 eldi meken bar. Bul aýyldarda tek 15 polıgon zańdy túrde jumys isteıdi. Ǵaryshtyq monıtorıng derekterine sáıkes, 2025 jyly 155 zańsyz qoqys orny anyqtalǵan, onyń tek 76-sy joıylǵan. Hromtaý jáne Qarǵaly aýdandarynda birde-bir ýchaske tazartylmady. Endi jyl sońyna deıin turmystyq qatty qaldyq obektileri tolyq tsıfrlandyrylady. Oǵan polıgondardyń jer aktileri, jobalary jáne ruqsattary týraly málimetter, qaldyqtardy suryptaý men qaıta óńdeý jónindegi aqparat engiziledi. Qoqys tasıtyn kólikterge GPS ornatylady, barlyq derekter arnaıy portaldarǵa júkteledi.
- Oblys ortalyǵy men aýdandarda qaldyqtardy jınaý, shyǵarý, suryptaý jáne kómý tarıfteri, sondaı-aq kommýnaldyq qaldyqtardy basqarý baǵdarlamalary bekitilýi tıis. Tarıfter barlyq jerde bekitilgen. Biraq baǵdarlama tek Aqtóbe qalasy men alty aýdanda ázirlengen. Qalǵany jyl sońyna deıin aıaqtaýy qajet,- dedi oblys ákimdiginde ótken jıynda Isataı Espaǵanbetov.
Aqtóbe oblysy ákiminiń baspasóz qyzmetiniń habarlaýynsha, keıbir aýdan ortalyqtary men aýylǵa jańa polıgon salý úshin joba ázirlenip jatyr. Olar: Badamsha, Shubarqudyq, Yrǵyz, Oıyl, T.Júrgenov, Qarabutaq aýyldary. Qazir oblys ortalyǵynda bes qaıtalama shıkizat qabyldaý pýnkti jumys isteıdi. Qaldyqtardy suryptaý jáne qaıta óńdeý salasynda 15 shaǵyn jáne orta bıznes sýbektisi qyzmet atqarady, olardyń altaýy qaıta óńdelgen materıaldardan ónim shyǵarady.
Eske salsaq, bıyl Aqtóbeniń polıgonyn senimgerlik basqarýǵa alǵan «Taza Álem 12» JShS qoqys shyǵarýshylardy da, ákimdikti de sotqa bermek. Ol buǵan deıin tasymaldaýshylardyń kelisimshartqa otyrmaǵanyn, bir teńge de tólemegenin, birneshe aı ótse de ótinishke qulaq aspaǵanyn aıtyp otyr.
Eki aradaǵy daý kezinde qoqys polıgon janyna tógilip, keıin ony joıý jumysy júrgizildi. Al Aqtóbe ekologteri polıgon janyna qoqys tógý deregin tekseredi.