Aqtóbede ekspress testten ótkizetin emhanalar tizimi belgili boldy
AQTÓBE. QazAqparat - Aqtóbe qalasy boıynsha úsh emhanada koronavırýsqa qarsy jedel testten ótýge bolady, dep habarlaıdy QazAqparat tilshisi.
Aqtóbe oblysy ákimdigi janyndaǵy jedel shtabtyń habarlaýynsha, «COVID-19» ınfektsııasyn anyqtaý úshin aqyly ekspress-testten ótetin mobıldi keshen jumysyn bastady. Olar: T.Ahtanov kóshesindegi №2 qalalyq emhana, 12 yqsham aýdandaǵy №3 qalalyq emhana, aǵaıyndy Jubanovtar kóshesindegi №4 qalalyq emhana.
Ekspress-test baǵasy - 9 myń teńge.
«Ekspress testti skrınıng ádisi dep esepteýge bolady. Az ýaqytta kóp adamdy tekserýge múmkindik beredi. Alaıda túbegeıli dıagnoz qoıýǵa bolmaıdy. Kúmán bolsa laboratorııalyq taldaý qajet», - dedi oblystyq densaýlyq saqtaý basqarmasynyń basshysy Áset Qalıev.
Aıta keteıik, qazirgi ýaqytta polıtsııa qyzmetkerleri jedel testten ótip jatyr. Blokpostta turǵandardan synama alynyp, nátıjesinde 60-tan astamy ınfektsııalyq aýrýhanaǵa jatqyzyldy. Qazir qalada 16 jeke úı men kópqabatty úıdiń 40-tan astam podezi karantınge jabyldy.
