Aqtóbede eks-depýtat qylmystyq jazadan qutylyp ketti
AQTÓBE. QazAqparat - Aqtóbede eks-depýtat, kásipker Meıirjan Óndirgenovke 118 mıllıon teńge salyq tólemegen dep aıyp taǵyldy. Biraq bir aı buryn qylmystyq qýdalaý merzimi ótip ketip, is toqtatyldy, dep habarlaıdy QazAqparat tilshisi.
Aqtóbedegi jolaýshylar tasymalyn júrgizetin mekemeniń basshysy Meıirjan Óndirgenov ótken jyly qylmystyq jazaǵa tartylyp, 4 jylǵa bas bostandyǵynan aıyrylǵan bolatyn. Buǵan deıin habarlaǵanymyzdaı, eks-depýtat, kásipker raqymshylyqqa iligip, jaza merziminiń tórtten bir bóligi qysqartylyp, keıin aıyppulǵa aýystyryldy . Al taıaýda prokýrorlar taǵy bir qylmystyq isti tergedi.
Іs materıalyna súıensek, «Emsham kompanııasy - Emshan Co» zańdy tulǵalar birlestiginiń prezıdenti, «Al Aktobe» JShS dırektory Meıirjan Óndirgenov bas esepshimen birigip kompanııanyń shyǵyn kólemin kóterip, kirisin azaıtty. Nátıjesinde salyqty az tóledi. Sóıtip «Al Aktobe» JShS-i 2011 jyly bıýdjetke 74 mıllıon teńgeden astam shyǵyn keltirdi, salyq tólemedi.
Sonymen qatar, aıyptalýshy Meıirjan Óndirgenovtiń «AqJol LTD» JShS-de 70 paıyzdyq úlesi boldy. Bul kompanııanyń 44 mıllıon teńge salyq tólemegeni anyqtaldy. 2011-2012 jyldary aralyǵynda kompanııalardyń basshysy men bas esepshiler birigip, aldyn ala kelisip, satyp alǵan taýarlar men qyzmet qunyn negizsiz kóterdi jáne kiristi azaıtyp kórsetti. Qylmystyq is tergelip, sotqa jetkenimen, merzimi ótip ketken. №2 Aqtóbe qalalyq sotynyń sýdıasy Dınara Gılmanova aıyptalýshy Meıirjan Óndirgenovke qatysty qylmystyq isti toqtatýǵa qaýly shyǵardy.
«Aıyptalýshy Meıirjan Óndirgenovke qatysty qylmystyq isti toqtatý týraly usynysy qabyldandy. Qylmystyq is merziminiń ótip ketýine baılanysty toqtatylady. Meıirjan Óndirgenovten 572 988 teńge sot shyǵyny óndirilsin. Sot sheshimine prokýratýra appelıatsııalyq shaǵym túsire alady»,- dedi sýdıa Dınara Gılmanova.
Aıta keteıik, qazir osy iske qatysty bas esepshiler de aıyptalyp jatyr.
