Aqtóbede ekpe jasalmaǵan balalar sany artyp keledi
AQTÓBE. QazAqparat - Aqtóbe oblysy boıynsha 2590 balaǵa ekpe jasalmaǵan. Ata-analardyń bas tartýy 2018 jyly da tirkeldi, dep habarlaıdy QazAqparat tilshisi.
Aqtóbelikterdiń ómir súrý uzaqtyǵy 73,6 jasqa jetti. Jyl ótken saıyn qala turǵyndarynyń sany artyp, aýyl halqy azaıyp keledi. Ótken jyly týý kórsetkishi 2 paıyzǵa artty. Óńirde bir jyl ishinde 126 myńnan astam adam dárigerge qaralyp em alsa, onyń 33 myńnan astamyna ota jasaldy.
«Ólim kórsetkishi boıynsha júrek-qan tamyrlary aýrýy, ókpe-tynys aýrýlary men asqazan derti alda tur. Ana men balanyń densaýlyǵyn qorǵaýǵa da kóp kóńil bólinedi. Ókinishke qaraı, ótken jyly 1 jasqa deıingi balalar arasyndaǵy ólim kórsetkishi artyp otyr. Qobda, Muǵaljar, Baıǵanın aýdandarynda jıi tirkeldi. Birinshiden - uryqtyń jetilmeýi, áıel densaýlyǵynyń nasharlyǵy, ekinshiden - týabitti aýrý, úshinshiden - juqpaly-parazıtarlyq aýrýlar sebep. Keıde dárigerler ÝZD kezinde dertti anyqtaı almaı jatady. Oblystyq perenataldyq ortalyqtyń klınıka-dıagnostıka ortalyǵynda ÝZD jasaý orny ashylady. Jeke kompanııamen kelisim jasaldy, naýrsyz-sáýir aıynda jumysqa kirisedi», - dedi oblystyq densaýlyq saqtaý basqarmasynyń basshysy Áset Qalıev.
Aqtóbede qaterlik isiktiń aldyn alý maqsatynda qosymsha skrınıng iske qosyldy. 55 jastan asqan, 30 jyldan astam ýaqyt boıy temeki tartyp júrgen adamdar tekseriledi. Sebebi, ótken jyly ókipedegi qaterli isikten 93 adam kóz jumdy. Ári ekpeden bas tartqandar sany artyp otyr.
«Aqtóbe oblysy boıynsha 2590 balaǵa ekpe jasalmady. Olardyń sany taǵy 59 balaǵa artyp otyr. Temir, Muǵaljar, Baıǵanın, Alǵa, Shalqar, Hromtaý aýdandary men Aqtóbe qalasynda másele bar. Eki jyl buryn arnaıy shtab qurylyp, túsindirý jumystary júrgizildi. Olarmen kezdesýden soń ekpe alyp jatyr. Biraq jańa bosanǵan analar keıde balasyna ekpe jasatýdan bas tartady. QR Densaýlyq saqtaý mınıstrligine májbúrlep vaktsınatsııalaýdy usynǵan edik. Qazir tek halyqqa túsindirýmen shektelip júrmiz», - dedi Áset Qalıev.
