Aqtóbede ekonomıkalyq tergeý departamentiniń eki qyzmetkeri sot aldynda jaýap berip jatyr
AQTÓBE. KAZINFORM — Sottalýshy Ermek Mahambetovke asa iri kólemde para alýǵa oqtalý, Dáýlet Sarınge paraqorlyqqa deldal bolý boıynsha aıyp taǵyldy. Para somasy — 50 mln teńge.
Іs Aqtóbe oblystyq qylmys ister jónindegi mamandandyrylǵan aýdanaralyq sotyna tústi. Búgin basty sot talqylaýy bastaldy. Prokýror Ildar Ábıev aıyptaý aktisin oqydy. Aıyptaý aktisine súıensek, byltyr kóktemde Aqtóbede «El qýaty» tutynýshy kooperatıviniń basshysy Erlan Bokýshevke qatysty qylmystyq is qozǵaldy. Ol Qylmystyq kodekstiń «Qarjylyq (ınvestıtsııalyq) pıramıdany qurý jáne oǵan basshylyq etý» baby boıynsha kúdikke iligip, tergeý júredi. Sol kezde otbasyna tıesili eki kólik tárkilenedi. Alaıda Aqtóbede bul is boıynsha aryzdanýshy, jábirlenýshi bolmady. Soǵan qaramastan tergeý jumysyn júrgizgen E. Mahambetov qaıta-qaıta jaýap alyp, tipti qylmystyq is boıynsha qandaı jaza qarastyrylǵanyn qosa eskertedi.
Sol kezde kásipker E.Bokýshev óz aǵasynyń dosy D. Sarınge ótinish jasaıdy. Aqtóbe ekonomıkalyq tergeý departamenti ekinshi jedel basqarmasy bastyǵynyń orynbasary E.Sarın tergeýshi E.Mahambetov habarlasady. Alaıda qandaı da bir ótinish aıtpaıdy, tek istiń tergeýge túskenin biledi.
— Mahambetov Bokýshev pen onyń týystarynyń tabysyn kórip, deldal arqyly kelisim jasaýdy kózdeıdi. Ol oıyn iske asyrý úshin Sarındi paıdalanýdy oılaıdy. Kabınetindegi tergeý jumystary kezinde qorǵaýshylardyń joq ekenin paıdalanyp, isti qysqartý úshin para berý jaıyn aıtady. Paranyń somasyn qaǵazǵa jazady. Keıin Bokýshev qorǵaýshysymen birge taǵy da tergeýge barady. Sol kezde Mahambetov qorǵaýshysyz sóılesýdi usynady. Biraq Bokýshev kelispeıdi. Sóıtip qaıta-qaıta tergeýge shaqyryp, moraldyq turǵyda qysym kórsete bastaıdy. Birde tergeýge uly E. Bokýshevti shaqyryp, janynda ekeýinen basqa eshkim bolmaǵanyn paıdalanyp, Erlan Bokýshevke habarlasady. 50 mln teńge taýyp, Sarın arqyly berýdi talap etedi. Eki kólikti berip, isti qylmystyq quram bolmaǵan soń toqtatýǵa kelisedi, — dedi memlekettik aıyptaýshy.
E.Bokýshev UQKD baryp, bolǵan mán-jaıdy aıtady. Aldyn ala kelisim boıynsha óńdelgen 90 500 dollarǵa óziniń 1 600 dollar aqshasyn qosyp, Aqtóbe oblystyq ekonomıkalyq tergep-tekserý departamentiniń aldyna kólikpen keledi. Bokýshev barlyǵy 92 100 dollardy Sarınge berip jatqan jerinen arnaıy qyzmet tintý júrgizdi. Prokýrordyń aıtýynsha, ǵımarat ishinde bolǵan aǵa tergeýshi E.Mahambetov munyń bárin terezeden qarap turǵan.
Aıyptaý aktisine súıensek, E.Mahambetovke Qylmystyq kodekstiń 24-baby 3-bóligi, 366-baby 4-bóligi, al D. Sarınge 368-baby 4-bóligi boıynsha aıyp taǵylyp otyr.
Sot otyrysynda Dáýlet Sarın ózine taǵylǵan aıypty moıyndady, sotqa deıingi tergeýde bergen jaýabyn maquldady. Al sottalýshy E.Mahambetov taǵylǵan aıypty moıyndamaıtynyn, aıyptaý aktisiniń bári ótirik ekenin jetkizdi. Qorǵaýshylary E.Bokýshevti jábirlenýshi qatarynan alyp tastaýdy surady.
Buǵan deıin habarlaǵanymyzdaı, Aqtóbede avıajóndeý zaýytynyń eks-basshysy sottaldy. Ol zaýytqa keltirgen materıaldyq shyǵyndy óteýi tıis.
