Aqtóbede ekologter qalany kók tútinge kómgen qoqys polıgonyn tekseredi
Aqtóbe qalasyndaǵy qoqys polıgony ortalyqtan 2 shaqyrym qashyqtyqta ornalasqan. Jel kúsheıgen kezde ortalyqty kók tútin basyp, jaǵymsyz ıis qolqany qabady. Mundaı jaǵdaı 2 maýsym kúni bastaldy. Ekologter aýaǵa taraǵan zııandy qaldyqtardyń mólsheri shamadan tys aıtqanyn aıtyp, tekserýdi bastamaq.
«Zerthanalyq taldaý bóliminiń mamandary taldaý júrgizdi. Qoldaǵy aqparatqa súıensek, kómirtegi oksıdi 4,44 ese, azot dıoksıdi 16,3 ese, kúkirt dıoksıdi 13,9 ese asyp tur. Ekologııa departamenti qoqys polıgonyna jaýapty «Tabys Aqtóbe» JShS-ine jospardan tys tekserý taǵaıyndady. Kásipkerlik kodeksiniń talabyna sáıkes aldaǵy ýaqytta tekserý júrgizilip, kináli anyqtalsa, zań aıasynda jaýapqa tartylady», - dedi Aqtóbe oblysy boıynsha ekologııa departamenti memlekettik ekologııalyq baqylaý bóliminiń basshysy Turar Qojanov.
Aıtyp óteıik, qoqys polıgony 2007 jyly paıdalanýǵa berildi. 2015 jyly birinshi ret órtenip, keıin mundaı derek jyl saıyn tirkelgen.
«Byltyr qoqys polıgony 17 ret órtendi. 2021 jyly 30 ret ot tutanǵan. Bıyl 7 ret órt tirkeldi. Qazirgi órt 2 maýsym kúni tutanyp, áli byqsyp jatyr. Sóndirý jumystaryna tótenshe jaǵdaılar men jergilikti atqarýshy organnyń kúshi jumyldyryldy. Tútindi basýdyń jalǵyz joly – qum tóseý. Sebebi, mundaǵy qoqystyń tereńdigi 15-20 metrge jetken. Órttiń aýmaǵy – 1 ga», - dedi qala ákiminiń orynbasary Aıdos Hamıev.
Onyń aıtýynsha, eski polıgonnyń betine qalyńdyǵy 60 sm bolatyn topyraq tóseý josparlanyp otyr. Oǵan 219 mln teńge qarjy jumsalmaq. Sonymen birge, 12 ga aýmaqty quraıtyn jańa qoqys polıgony salynady.
«Byltyr 22 aıyppul salyndy. Ol 680 myń teńge. Bıyl 7 hattama toltyryldy. Osy jyly 400 myń teńge aıyppul tólendi», - dedi «Tabys Aqtóbe» JShS-niń dırektory Asanáli Qaıdarov.
Eske salsaq, Aqtóbede qoqys polıgony órtenip, qalany kók tútin basty.
Foto: Aqtóbe oblysy ákiminiń baspasóz qyzmeti
