Aqtóbede ekologter jaǵymsyz ıistiń qaıdan shyqqanyn anyqtady
AQTÓBE. KAZINFORM - Qustyń sańǵyryǵy - jaǵymsyz ıistiń kózi. Kásipker ony qaladan alys alqapqa aparyp tógýi tıis.
Aqtóbe ekologtary birneshe kún boıy ıistiń qaıdan shyqqanyn taba almaı, tipti turǵyndardan kómek surady. Al búgin ıistiń qaıdan shyqqanyn anyqtaǵanyn aıtyp, aqparat taratty.
Oblystyq ekologııa departamentiniń basshysy Erbol Qýanovtyń aıtýynsha, tabıǵatty qorǵaý prokýratýrasy, oblystyq tutynýshylar quqyqtaryn qorǵaý departamenti, ekologııa departamenti zerthanalyq bóliminiń mamandarymen birlesip, jumys júrgizgen.
- Jaǵymsyz ıistiń shyǵý oshaǵy qustyń sańǵyryǵyn organıkalyq tyńaıtqysh retinde qoldanǵan sharýashylyq aýmaǵy bolyp otyr. Alǵa aýdanynyń Bestamaq aýyly men Aqtóbe qalasynyń arasynda ornalasqan «Aqtóbe agro» sharýa qojalyǵy Aqtóbe qalasynyń 41-razezd aýmaǵyndaǵy qus fabrıkasynan kóp kólemde qustyń sańǵyryn organıkalyq tyńaıtqysh retinde alyp, 120 gektar jerdi tyńaıtýǵa paıdalanǵan. Tyńaıtqyshty jaıǵan kezde onyń ıisi jeldiń ekpinimen qalany túgel alyp ketip otyr. Bul anyqtalǵan boıdan bizdiń mamandar orynǵa shyǵyp, sharýa qojalyǵynyń basshylyǵyna ol jerge endi muny paıdalanbaý týraly eskertip, nusqama berdi. Olar eki-úsh kúnde tyńaıtqyshtyń qalǵan qaldyǵyn qaladan jáne jalpy halyq turatyn eldi mekenderden alysta ornalasqan alqaptaryna shyǵaryp tastaıtyn boldy. Sondaı-aq, 41-shi razezd aýmaǵynda ornalasqan qus fabrıkasy da bizdiń nazarymyzdan tys qalmady. Olarǵa aýany tazalaıtyn ozonatsııa tehnologııasyn qoldaný jóninde talap qoıyldy. Olar eki aıda qondyrǵyny ornatýdy mindetterine alyp otyr», - dedi Erbol Qýanov.
Eske salsaq, eki apta buryn qalada jaǵymsyz ıis shyǵa bastady. Ekologtar qalanyń birneshe turǵyn alabynan synama alǵanymen, sol kezde zańsyzdyq anyqtalmady. Qazirgi kezde qaladaǵy káriz-sorǵy stansasy 70% tozyp tur. Bul da jaǵymsyz ıistiń bir kózi.