Aqtóbede ekologtar qalany jaılaǵan jaǵymsyz ıistiń qaıdan shyqqanyn anyqtaı almaı jatyr

AQTÓBE. KAZINFORM – Aqtóbe qalasyn jaǵymsyz ıis jaılady. Ekologtar shahardyń birneshe aýdanyna baryp, ólshem jasady. Biraq ıistiń kózi belgisiz.

Aqtóbe qalasynyń turǵyndary keshe keshkilik jaǵymsyz ıis shyqqanyn aıtyp, áleýmettik jeli arqyly óz shaǵymyn bildirdi. Ásirese Shanhaı, Altyn orda shaǵyn aýdandarynda ıis anyq sezildi. Ekologtar túnde birneshe núktege baryp, ólshem jasady. 

- Keshe mamandar saǵat 23:00-den bastap saǵat 02:00-03:00-ge deıin júrip, qalanyń birneshe aýdanynanda ólshem jasady. Ár aýdanda baqylaý júrgenimen, ıistiń qaıdan shyqqanyn anyqtaı almadyq. Iis Altyn orda shaǵyn aýdany, Sáńkibaı batyr dańǵyly boıynda qatty bolǵany ras. Qazir ıis joq. Mamandar taǵy da shyǵyp, qaraıdy. Túnde qandaı da kórsetkish tirkelmedi. Tipti zaýyt aınalasyna da bardy. Turǵyndardan jazbasha shaǵym túspedi, áleýmettik jelige jarııalady. Ózimiz de ıisti sezdik,- dedi Aqtóbe oblystyq ekologııa departamenti basshysynyń orynbasary Talap Usnadın. 

Aıta keteıik, Aqtóbe qalasynda jaz aılarynda jaǵymsyz ıis shyǵady. Bul problema birneshe jylǵa sozylyp keledi. Iistiń birneshe kózi bar. Eń úlkeni – káriz sorǵy stansasy.

Sonymen birge Aqtóbe qalasynda jańa káriz tazartý qondyrǵysyn salýǵa Eýropa qaıta qurý jáne damý bankinen qarajat tartylatyny týraly aıtyldy. Biraq ázirge jobanyń qaı ýaqytta iske asatyny belgisiz.