Aqtóbede ekinshi jel elektr stansasy iske qosyldy
Aqtóbe oblysynyń Qarǵaly aýdanynda «Badamsha-2» ekinshi jel elektr stansasy iske qosyldy. Jobany ıtalıandyq Eni kompanııasy jergilikti «Arm Wind» JShS-niń enshiles kompanııasy arqyly júzege asyryp otyr. Jobaǵa quıylǵan ınvestıtsııa 36 mıllıard teńgeni quraıdy. Sharaǵa oblys ákimi Ońdasyn Orazalın, Italııa Respýblıkasynyń Qazaqstandaǵy Tótenshe jáne Ókiletti Elshisi Marko Albertı, «Arm Wind» JShS basqarýshy dırektory Aleks Stıllavato, óńirdegi memlekettik organdar men damý ınstıtýttarynyń ókilderi qatysty.
«Bul óńirdiń ekonomıkalyq áleýetin damytýǵa, óndiristi jasyl energııamen qamtýǵa arnalǵan mańyzdy joba», - dedi oblys ákimi Ońdasyn Orazalın.
«Badamsha-2» jel elektr stansasynyń qurylysy 2021 jyldyń qyrkúıeginde bastaldy. Onyń qýattylyǵy 2020 jyldyń basynda paıdalanýǵa berilgen jáne qazirgi ýaqytta tolyq jumys istep turǵan «Badamsha-1» jel elektr stansasyna teń, ıaǵnı – 48 MVt. Elshi Marko Albertı quttyqtaý sózinde: «Bul Qazaqstandaǵy jel energetıkasy sektoryndaǵy iri jobalardyń biri. Osy arqyly 2030 jylǵa qaraı jalpy elektr energııasynyń 15% jasyl energetıka quraıdy», - dep atap ótti.
Búgingi tańda «Badamsha-2» jel týrbınalary Qazaqstanda kólemi boıynsha da (rotordyń dıametri – 158 metr, os bıiktigi – 101 metr), qýaty boıynsha da (árqaısysy 4,8 MVt) eń iri qondyrǵy bolyp tabylady. Jel týrbogeneratorlary jyl saıyn 200 GVt/saǵ deıin elektr qýatyn óndiredi dep josparlanyp otyr. Sonda jyl saıyn shamamen 37 000 úı osy energııany tutynady degen sóz. Sonymen qatar CO2 shyǵaryndylarynyń kólemin 173 000 tonnaǵa azaıady.
